U-Andile Jali uziphendulela ngezinsolo zomona ngoMofokeng
U-Andile Jali uthi yena akanamona futhi ngeke aze akhulume kabi ngomunye umdlali ngoba naye ulitholile elakhe ithuba wadlala wazenelisa.
Le nkakha ye-Orlando Pirates neMamelodi Sundowns ithi yona ebiqonde ukukusho wukuthi uRele Mofokeng akayekwe adlale ngendlela yakhe.
Usolwe kakhulu u-Andile Jali ngokuba nomona ngoMofokeng kulandela ukuphawula kwakhe kade ebuzwe ngokuqhathaniswa kwakhe noThemba Zwane.
“Angikaze ngaba nomona ngomunye umdlali mina,” kusho uJali. “Selokhu ngaqala ukudlala angikaze ngikhulume kabi ngomunye umdlali.
“Uma ngikhuluma, ngikhuluma ngami ngoba angifuni ukuthi ngize ngigcine sengithi ubani unjani.
“Mina umdlali ngimqonda ngqo, ngimtshele ukuthi, ‘mhlekazi, ungenza kangcono kunalento oyenzayo’. “Ngimtshela ngqo. Ngakho ngeke ngibe nomona ngomfana osakhula, osemncane kanje.
“Ngizoba nomona wani ngona nami ngidlalile. Isikhathi sami siphelile manje.”
U-Andile Jali uthe yena usexolile ngoba uyazi esakhe isikhathi sesidlulile ngakho usededele abanye nabo badlale.
“Mina isikhathi sami siphelile manje. Yekani abanye abantwana badlale, bakujabulele ukudlala.
“Thina kumele sizithuelele nje, sikhulume uma sithole ithuba elifana naleli kuphela.
Uphinde waveza ukuthi yena akufunayo wukuthi uMofokeng ayekwe adlale ibhola ngendlela yakhe, angalokhu eqhathaniswa.
“Akayekelwe lo mfana adlale ibhola, azijabulise ngebhola lakhe,” kuphetha u-Andile Jali.
