U-Ouaddou uveza afuna abasakhula bakufunde kuMofokeng
U-Relebohile Mofokeng akazange athathe isikhathi eside ukuzakhela igama phesheya, futhi lokho kushiye umqeqeshi wakhe wakudala u-Abdeslam Ouaddou engawuvali umlomo.
Lo mdlali owaziwa ngo’President yama2K’ kuleli ungene emabhukwini omlando kuleli sonto eshaya igoli lakhe lokuqala kwi-Europa League.
Nguye oshaye igoli lokuqala ngesikhathi iRoyale Union Saint-Gilloise ihlula iViktoria Plzeň ngo-3-0 ngoLwesine ebusuku.
Leli bekuyigoli lakhe lesine emidlalweni eyisishiyagalombili selokhu efike kuleli qembu laseBelgium.
Emuva eSoweto, umqeqeshi wePirates u-Abdeslam Ouaddou akazange akufihle ukujabula kwakhe ngempumelelo ka-Relebobile Mofokeng.
“I-Orlando Pirates ibilokhu yakha abadlali abakhulu kusukela kudala, futhi kufanele sinike ikilabhu udumo ngalokho,” kusho u-Ouaddou.
“Uma sengibuyela kuRele, abadlali bami ngibathanda kakhulu,” kusho lo mqeqeshi waseMorocco.
“Uyisibonelo okufanele sisilandele uma sifuna ukuvelela ebhleni lamazwe ngamazwe.
“Lo mfana ubezimisele kakhulu. Konke abekwenza eqenjini lethu bekuhlale kuya phambili.
“Ngijabule ngaye. Ngiyethemba uzoqhubeka kanjalo. Uyisithombe esihle kakhulu se-Orlando Pirates e-Europe.”
UMofokeng useshaye amagoli amane emidlalweni eyisishiyagalombili kule sizini neqembu laseBelgium.
- FUNDA NALA | Kushikisha ufudu kwiBetway Prem
Manje u-Relebohile Mofokeng useqalile ukubhala igama lakhe esiteji sase-Europe, kanti u-Abdeslam Ouaddou ufuna abanye abadlali abasebancane balandele lesi sifiso sokuphumelela.
- EZISHISAYO| Cofa lapha usithole kuWhatsApp
