Owodumo kwiPirates neDowns usevuke ngeqembu eZimbabwe
Owayengumdlali ovelele kwiPSL uKudakwashe Mahachi usebuyele ngokusemthethweni enkundleni, ngemuva kweminyaka ebhekene nezinkinga.
UMahachi – oke wabhekana namacala okubulala usebuyile ebholeni njengoba esesayine kwizinkunzi zaseZimbabwe iHighlanders FC.
Umsebenzi walo mdlali wasophondweni oneminyaka engu-32 ubudala waphazamiseka cishe iminyaka emine ngesikhathi ebhekene namacala.
Kodwa manje usebheke ukuthi ekugcineni avumele izinyawo zakhe kube yizo ezikhulumelayo enkundleni.
Ukubuya kwakhe kusheshe kwaba nomthelela – esiza iHighlanders ishaya izimbangi zayo ezinkulu iDynamos.
ISIQALO ESISHA
UKuda Mahachi bekuyigama elidumile eNingizimu Afrika cishe iminyaka eyishumi edlala emaqenjini ehlukene.
Udlale imidlalo engaphezu kuka-180 futhi waba nsesandla emagolini angu-44 (ushaye angu-23, wakha angu-21).
Kuwo wonke amaqembu adlale kuwo kwiBetway Premiership ubeba ngumdlali obalulekile.
Wafikela kwiMamelodi Sundowns, wabe esedlulela kwiGolden Arrows lapho afike waba ngomunye wabadlali abagqamile.
Wabe eseheha i-Orlando Pirates eyabe seyimsayina kodwa akangahlala isikhathi eside kuyo, wabe esedlulela kwiSuperSport United.
KukwiSuperSport lapho kuqale khona izinkinga, esolwa ngokubulala ingane yakhe ekhubazekile okwenza kwanqanyulwa inkontileka yakhe.
UMUNYU EUYELA EBULAWAYO
Ekhuluma neFARPost ngemuva komdlalo wakhe wokuqala, uMahachi uvumile ukuthi isisindo seminyaka emibili edlule besinzima.
“Ngivukwa umunyu ngoba sekuphele iminyaka emibili ngingadlali…
“Ngakho, ukuza kwiHighlanders kuyinto enhle kakhulu kimina,” kusho uMahachi.
“Ukunqoba sibhekene neDynamos emdlalweni wokuqala kwengeze injabulo kakhulu.”
OKUBHEKWE KUYE
Nakuba emusha eqenjini, uKuda Mahachi ungumdlali ‘omdala’ ngenxa yamava akhe ngaphakathi nangaphandle kwenkundla.
Lokhu mhlawumbe kube ngesinye sezizathu ezenze iHighlanders imsayine yize ebesenesikhathi engekho ebholeni elikhokhelayo.
- Ubuholi eqenjini: UMahachi uphawule ukuthi “unomsebenzi omkhulu okufanele awenze” ukweluleka “izihlabani zakusasa” zeqembu.
- Isethembiso sabalandeli: Ufunge wagomela ukuthi uzokwenza abalandeli beHighlanders bahlezi bejabule njengoba belwela isicoco seCastle Premier League.
UKWAKHA KABUSHA
Nakuba ijubane lakhe kungenzeka ukuthi selehlile ngenxa yeminyaka, ikhono likaMahachi liyisikhali sakhe esibalulekile.
IHighlanders izokwethemba ukuthi amava akhe azosiza ikakhulukazi emidlalweni enengcindezi ephezulu.
Udaba lukaKuda Mahachi alusekho ‘ngezinselelo zomthetho’, kodwa yithuba lokugeza igama lakhe ngokwenza lokho akwazi ukwedlula yonke into.
FUNDA NALA | Owe-Arrows uxosha awaseGauteng ashela uNdlovu
Kubalandeli beHighlanders, ukubona “uMahachi wakudala” eshibilika edlula abadlali basemuva ngenye yezinto ababheke ukuzibona kule sizini ka-2026.
