OweLupopo uveza icebo abadide ngalo i-Orlando Pirates
Umqeqeshi weSt Eloi Lupopo uGuy Bukasa usedalule imfihlo yokushaywa kwabo i-Orlando Pirates ngeSonto.
Iqembu leBukasa lithuse abaningi ngesikhathi libhubhudla i-Orlando Pirates ngo 3-0 emdlalweni womlenze wokuqala weCaf Champions League.
Iziqhwaga zaseDR Congo zimangaze amaBhakabhaka eLubumbashi, ngamagoli kaKashala Wanet, Dramane Kambou, noJean Benoit Tukumbane Banga.
Lo mphumela ubabeka endaweni enhle kakhulu ngaphambi komdlalo womlenze wesibili ozoba se-Orlando Stadium ngoMgqibelo ntambama.
“Besiwazi kahle amandla ePirates,” kusho uBukasa ekhuluma nabezindaba ngemuva komdlalo.
“Besazi ukuthi bayawulawula umdlalo, ngakho-ke thina sihlale emuva sanesineke futhi salinda izikhathi ezifanele zokuhlasela.
“Ubukhali bethu ekuhlaseleni ngokuzumisa yikho okwenze umehluko.” UBukasa uncome ukuzibamba kwabadlali bakhe.
“Sivumele iPirates ukuthi iphathe ibhola uma lidingeka kanjalo, kodwa sabajezisa lapho kuvela isikhala.”
WINA | Imali yokuqala ibhizinisi lezemfashini neNikNaks
Yize besesimweni esihle futhi manje sebeyizintandokazi ezicacile zokudlulela esigabeni samaqoqo, uBukasa uxwayise ngokuthi umsebenzi awukakaqedwa.
“Basicindezelile basikhombisa ubungozi babo,” kuqhuba yena. “Sisazohlaziya lo mdlalo bese silungiselela uhlelo olufanele lomlenze wesibili. Ngeke kube lula, kodwa sizobe sesilungile.”
FUNDA NALA | UMayo ubhoboka ngegoli alincisha uMmodi
I-Orlando Pirates manje idinga ukwenza isimangaliso ekhaya ukuze iguqule o mphumela ukuze igcine amaphupho ayo eChampions League ephila.
