Isiqalile imizamo yokuqinisa iqembu kwiDurban City
Ompetha abasanda kunikwa isicoco seMotsepe Foundation Championship, i-Durban City sebeqalile ukubheka abadlali abazoqinisa ngabo iqembu labo.
I-Durban City igcine inikezwe izindondo nendebe yayo emcimbini oyisipesheli ngoLwesibili ntambama.
Ukuthweswa kwabo isicoco njengompetha kubambezelekile ngemuva kokuthi izimbangi zabo ezimbili, iJDR Stars neCape Town Spurs bevule amacala.
Kodwa njengoba esedlulile lamacala, iDurban City kubikwa ukuthi isibheke ukuheha umdlali wasemuva uNjabulo Ngcobo ukuthi abuyele KwaZulu-Natal.
Lo mdlali oneminyaka engu-31 ubudala okwamanje usemabhukwini eSekhukhune United ayijoyine ekuqaleni kwesizini ka-2024/25 ngemuva kokushiya iKaizer Chiefs.
UNgcobo ubelizw angendaba ijezi. Ukulimala nombango wezindawo noDaniel Cardoso, Tresor Yamba, noKatlego Mohamme kumenze weqiwa yijezi.
Udlale imidlalo eyisithupha kuphela kuyo yonke imiqhudelwano, okuhlanganisa emihlanu kwiBetway Premiership nowodwa kwiCarling Knockout Cup.
Ngokubika kweFARPost, iSekhukhune United ivulekelile ukudedela uNgcobo ahambe.
Lo mdlali kuthiwa naye uzimisele ngokujoyina i-Durban City esanda kukhushulelwa kwiligi enkulu.
UNgcobo wake wabonakala njengomdlali oya kude ebholeni laseNingizimu Afrika.
Abanye baze baqagula ukuthi kuyishaya lezi zikhathi esengumdlali obalulekile kwiBafana Bafana.
Lokho babekusho ngemuva kwesizini yakhe yokuqala kwiPremiership edlala kwiSwallows FC, la adlala kahle waze waqokwa waba yiDefender of the Season.
Wabe esejoyina iChiefs, kwaba wukubhimba kwezinto kuye njengoba agcina ehlulekile ukungena ngokuphelele eqenjini eliqala imidlalo.
Kube ukuphela kwenkontileka, wabe esededelwa nokuyilapho ebe eseyojoyina iSekhukhune.
UNgcobo angase abone ithuba lokubuyela ekhaya eThekwini njengelokuvuselela umsebenzi wakhe abuyele ekudlaleni njalo.
