Siyamsebenzela isiqalo esisha eTanzania uDe Reuck
URushine De Reuck ubonakala engomunye wabadlali abeza kahle ukusukela ejoyine iSimba SC, njengoba eqhubeka nokudlala ngendlela ehlukile kwiligi yaseTanzania.
Lo mdlali wasemuva usephenduke ingozi noma kuyiwa phambili, ekhombisa izinga eselimenze waba mqoka eqenjini.
UDe Reuck – obekade ekwiMamelodi Sundonws iminyaka emine edlule – usanda kuba nomunye umdlalo oncomekayo la ephinde wahaya igoli imidlalo ilandelana.
Igoli lakhe lakamuva liqhamuke ngesikhathi iSimba inqoba ngo 3-0 ishaya iNamungo, lapho igalelo lalo mdlali owake wagijima kwiBafana Bafana lihlale obala.
UDe Reuck uklonyeliswe ngendlela efanele ngendondo yoMdlali oVelele ngemizamo yakhe emdlalweni weNamungo.
Lokhu kugqamisa umthelela wakhe eqenjini: akagcini nje ngokwenza kube nozinzo emuva, okusiza iqembu lingangenelwa magoli.
WINA | Ithuba lokuwina neVicks neLisenethini
Kodwa futhi ubuye afake nesandla uma kuhlaselwa, akwazi ukuqiniseka ukuthi amagoli awaqhamuki kuphela ngabadlali baphambili.
Lesi sitobha – esijoyine iSimba nozakwabo abebenaye kwiSundowns uNeo Maema – useyikhongco elibalulekile kwiSimba.
FUNDA NALA | UMutizwa uphawula ngokushiya kwi-Arrows
Umgqigqo wakhe wamanje uphakamisa ukuthi udlala ibhola elihle kakhulu futhi uvuselela ibhola lakhe kusukela athuthela e-East Africa.
Uma eqhubeka ngalo mgqigqo wakhe, angase abe sethubeni lokubuyela kwiBafana Bafana ebheke kwi-Africa Cup of Nations ngoDisemba.
