Onompempe bakuleli kwabayoshaya indweba kwiNdebe yoMhlaba
INingizimu Afrika izoba nokumeleleka okuqinile kwiNdebe yoMhlaba — hhayi nje ngeBafana Bafana ezobe igila izimanga enkundleni.
Kodwa kuzobe kukhona nonompempe u-Abongile Tom nomsizi wonompempe uZakhele Siwela njengoba bengenile ohlwini lonozinti abazosebenza kulo mqhudelwano.
UTom, oneminyaka engu-34 ubudala, uqokwe konompempe abangu-52 abazoshaya indweba kwiNdebe yoMhlaba e-US, eMexico naseCanada.
Lo mqhudelwano uqala ngoJuni 11 uphele ngoJulayi 19. USiwela yena uyingxenye yabasizi bonompempe abangu-88 abaqokelwe le ndumezulu.
KuTom odabuka eKapa, ukuqokwa kuphawula ingqophamlando emsebenzini wakhe njengoba kungokokuqala eyosebenza kwiNdebe yoMhlaba.
Uvele uthathwa njengomunye wonozinti abaphambili kwiPSL, kanti usekhule kakhulu kusukela athola ibheji leFIFA ngo-2020.
Usezakhele igama ngendlela encomekayo, kanti ubesebenza kwi-Africa Cup of Nations ka-2023 neka-2025.
Ubekhona nasemdlalweni wamanqamu wezimanga la abengunompempe wesine kubhekene iMorocco neSenegal.
Ngakolunye uhlangothi, uSiwela usenamava njengoba kuzobe kungokwesithathu esebenza kwiNdebe yoMhlaba.
Wayekhona eRussia ngo-2018 naseQatar ngo-2022. UTom ungomunye wonompempe abayisikhombisa base-Afrika abakhethiwe.
