Okushiwo uDu Preez eshiya kwiKaizer Chiefs
U-Ashley Du Preez usebhale umlayezo othinta inhliziyo evalelisa kwi-Kaizer Chiefs ngemuva kojoyina ngokusemthethweni iStellenbosch FC.
Lo mgadli oneminyaka engu-29 ubudala wethulwe yiStellenbosch ngoLwesibili.
Ukubuyela kwakhe kwiStellies bekuyingxenye yesivumelwano sokushintshana ngabadlali, esenze uLangelihle Phili ajoyine Amakhosi.
U-Ashley Du Preez ushiya i-Kaizer Chiefs ngemuva kokuyidlalela amasizini amane, njengoba wayeyijoyine esuka kwiStellenbosch ngo-2022.
Ekhuluma ezinkundleni zokuxhumana, uDu Preez ubonge wonke umuntu abe yingxenye yohambo lwakhe eNaturena.
“Ngemuva kweminyaka emine engingasoze ngayikhohlwa, sekuyisikhathi sokuvala lesi sahluko esingifundise okuningi empilweni,” kubhala uDu Preez.
“Ngibonga iKaizer Chiefs ngokukholelwa kumfana owayenephupho nokunginika ithuba lokugqoka ijezi leqembu engakhula ngiliseka.”
Uthe ukudlalela iqembu ayelithanda kusukela esemncane bekungelinye lamalungelo amakhulu empilweni yakhe.
“Ngibonga bonke abaqeqeshi, ozakwethu, izisebenzi nabo bonke abasebenze ngemuva kwezigcawu.
“Izifundo, izinselelo, ukunqoba, ukuhlulwa nezinkumbulo konke kungisizile ukuba ngumdlali nomuntu ongcono.”
Uphinde wancoma abalandeli beChiefs ngokumeseka ngaso sonke isikhathi.
“Kubalandeli, ngiyabonga ngothando lwenu, ukungeseka kwenu nokuma nami ezikhathini ezinhle nezimbi.
“Ukugqoka leli jezi nokuzwa amazwi enu kuzohlale kunendawo ekhethekile enhliziyweni yami.
“Njengoba ngiqala isahluko esisha, ngihamba ngigcwele ukubonga nokuziqhenya ngakho konke engikuthole kule kilabhu.
“Ngiyabonga kwiKaizer Chiefs ngeminyaka emine engingasoze ngayikhohlwa,” kuqhuba yena.
- FUNDA NALA | UMabasa ubhokoka ngokweqiwa yijezi kwiBucs
Njengoba esesivalile isahluko se-Kaizer Chiefs, manje u-Ashely Du Preez uzobheka ukuphinde enze kahle kwiStellenbosch.
- EZISHISAYO| Cofa lapha usithole kuWhatsApp
