Nedbank Cup: Lizosala kwesilandelayo elilodwa laKwaZulu
Elilodwa emaqenjini amane aKwaZulu asasele kwiNedbank Cup lizosala emzuliswaneni olandelayo.
Lokhu kungenxa yokuthi aqhathwe wodwa kulo mzuliswano obhekwe ngabomvu njengoba kulo nyaka kuzophuma umpetha omusha.
Oyedwa phakathi kweGolden Arrows neDurban City uzosala engayo emidlalweni eyandulela owamanqamu.
ICASRIC IYA KWAZULU
AmaZulu wona aqhatheke kangcono kodwa kuzomele azibambe ziqine njengoba ezobe esekhaya ebhekene neqembu elithuse abaningi iCasric Stars.
Leli qembu lasemPumalanga liwashisa i-Orlando Pirates – ebiyizintandokazi ukunqoba le ndebe – ijezi ngempelasonto.
AmaZulu wona afike kulesi sigaba ngokuchiliza omkhaya bayo iRichards Bay ababashaye ngo 1-0 ngoLwesihlanu.
IMILFORD IYA ELIMPOPO
ISekhukhune United, edlule kanzima kwi-University of Pretoria, iphinde yathola iqembu leMotsepe Foundation Championship.
Kulokhu iqhathwe nelizihola phambili kulesi sigaba iMilford FC yaKwaZulu ekhiphe omkhaya Umkhambathi FC emzuliswaneni odlule.
I-TS Galaxy, nayo emangaze abaningi idumuzaiMamelodi Sundowns ngo 2-0, ixegiselekile kulo mzuliswano njengoba iqhathwe neJacksa Spears.
ISpears idlala ezigabeni zeSafa futhi yiyo yodwa esisele kulo mqhudelwano emaqenjini aqhamuka ezigabeni ezingakhokheli.
Isiyonke imidlalo yalo mzuliswano ime kanje:
- AmaZulu FC v Casric Stars
- Sekhukhune United v Milford FC
- TS Galaxy v Jacksa Spears
- Golden Arrows v Durban City
Le midlalo izodlala ngempelasonto ka-7 no-8 kuMashi kanti imininingwane yezinkundla nezikhathi isazobuye imenyezelwe.
FUNDA NALA | Ezithembisayo ngoChislett kwiChiefs
Isasasa selivele ke liphezulu KwaZulu ngokuthi sekungenzeka le ndebe ize esifundazweni njengoba kuyiso esinamaqembu amaningi asele.
