Liyacikiza ikusasa koweChiefs ‘ophasa emuva njalo’
- Intatheli yeLISENETHINI
Indlela yokudlala yomunye wabadlali basesiswini beKaizer Chiefs kuthiwa ayihambelani nhlobo neyomqeqeshi omusha uNasreddine Nabi.
Lokhu kubikwa ukuthi sekwenze kwacaca ukuthi ijezi uzolizwa ngendaba kule sizini nakwazayo uma kusekhona lo mqeqeshi.
Ngokubika kwabeSNL24, uNkosingiphile Ngcobo kunombono wokuthi kubolekiswe ngaye ngoJanuwari ukuze athole ukudlala kwelinye iqembu.
Kuthiwa isitayela salo mdlali owaziwa ngelikaMshini, sokugcina ibhola nokuphasa namaphasi abheke emuva asihambelani nesifunwa uNabi.
“Kunzima kuMshini njengoba kuphethe umqeqeshi uNabi nje manje,” kucashunwe umthombo usho kanje.
“Ijezi uzolithola amacozucozu, noma agcine engalitholi nhlobo. Inkinga indlela adlala ngayo.
“Unesineke kanti uyathanda nokuphasa emuva ekubeni umqeqeshi ufuna abadlali abasheshayo nabaphasa baye phambili esiswini.
“Yingakho oMdu (Mduduzi Shabalala) noMfundo (Vilakazi) bona sebedlala njalo.
“Ngakho-ke uMshini ubhekene nenkinga enkulu eqenjini ukuya phambili,” kuchaza lo mthombo.
Kucashunwe nomunye umthombo uthi abaqeqeshi ngokubamnbisana nabaphathi bazama isixazululo sale nkinga ngoMshini.
Usasalelwe yiminyaka emibili kwinkontileka yakhe kanti kungaba wukuthi iyanqanyulwa, noma abolekiswe.
“Luyinkinga kakhulu udaba lwakhe ngoba ngathi akekho nhlobo ezinhlelweni zomqeqeshi,” kusho lo mthombo.
Omunye umdlali okuke kwavela isimo esifanayo ngaye uSibongiseni Mthethwa naye osolwa ngokuba nesineke kakhulu.
Nokho uNabi uke wabuzwa ngaye, wathi ukhona ezihlelweni zakhe, kuwukuthi kunemidlalo azomdinga kuyo.
