Kuza kahle e-US kogajwe kwiBafana Bafana

• Intatheli yeLISENETHINI

UBongokuhle Hlongwane ushaye amagoli amabili esiza iMinnesota United inqoba ngo 2-1 kwiSan Jose Earthquakes emdlalweni weMajor League Soccer ngoMgqibelo ebusuku. 

Yize engazange afakwe eqenjini labadlali abangu-23 likaHugo Broos elizodlala kweyokuhlungela i-Africa Cup of Nations ka-2025, uHlongwane uthole umklomelo wokuba nguMdlali oVelele.

Lo mdlali waseNingizimu Afrika, oneminyaka engu-24, uvule inkundla ngegoli ngomzuzu wesithupha. 

ISan Jose ibuyele emdlalweni, ithola elokulinhganisa ngo-Ousseni Bouda ngomzuzu ka-33. 

UHlongwane uphinde wabeka iMinnesota phambili ngomzuzu ka-63, eyitholela amaphuzu amathathu amqoka ekuhambeni.

Kule sizini, uHlongwane useshaye amagoli ayisikhombisa waphinde wakhela ozakwabo amane emidlalweni engu-26 kuyo yonke imiqhudelwano. 

Uphokophelele ukubuyisa indawo yakhe eqenjini leBafana Bafana osekunesikhathi agcina ukudlala kuyo.

Wagcina ukudlala eqenjini likaHugo Broos ngesikhathi ishaywa yiRwanda ngo 2-0 emdlalweni wokuhlungela iNdebe yoMhlaba ngoNovemba 2023.

Ukunqoba kweMinnesota United kuyinyusele endaweni yesishiyagalolunye kanti uHlongwane ube nesandla empumelelweni yayo yakamuva. 

• OLUNYE UDABA: Ele-PSL lifuna u-R15 million kumdlali olihlambalazile

Yize engasekho eqenjini lesizwe, ukusebenza kwakhe kwiMLS kusaqhubeka nokuhlaba umxhwele.