Kuvela elihlwithe uJose Riveiro kwi-Orlando Pirates

Ikilabhu entsha kaJose Riveiro isidaluliwe, futhi kuthiwa ifuna lo mqeqeshi waseSpain ayijoyine ngokushesha. 

I-Orlando Pirates ikuqinisekisile ngoMsombuluko ekuseni ukuthi uJose Riveiro uzokhululwa ngemuva komdlalo wangoLwesibili weBetway Premiership neGolden Arrows. 

Bekumele ahambe ekupheleni kwesizini uma kuphela inkontileka yakhe ngoJuni. Kodwa iqembu linqume ukumvumela ukuthi ahambe kusenesikhathi.

Lokhu kube ngokwesicelo sakhe kanti usihlalo wePirates u-Irvin Khoza ukuqinisekisile ukuthi uJose Riveiro usesayine nelinye iqembu. 

Futhi manje imibiko iphakamisa ukuthi ikilabhu yakhe entsha yiziqhwaga zase-Egypt i-Al Ahly esanda kuxosha uMarcel Kohler.

UKohler uxoshwe ngemuva kokukhishwa kwiCaf Champions League yiMamelodi Sundowns yakuleli.

Manje i-Al Ahly ifuna uJose Riveiro asebenze neqembu okungenani isikhathi esingangenyana ngaphambi kokuqala kweFifa Club World Cup.

Kubikwa ukuthi uRiveiro uthenjiswe amabhonasi nemihlomulo emikhulu uma engakwazi ukuhola i-Al Ahly idlule esigabeni samaqoqo kulo mqhudelwano ose-US. 

IFifa Club World Cup kulindeleke ukuthi iqale ngoJuni 14 futhi iqhubeke kuze kube uJulayi 13. 

I-Al Ahly ikuGroup A nePalmeiras yaseBrazil, iFC Porto yasePortugal ne-Inter Miami yase-US lapho kudlala khona uLionel Messi.

UJose Riveiro uhehe i-Al Ahly ngemuva kokuphumelela kwakhe kwi-Orlando Pirates lapho enqobe khona izindebe ezinhlanu eminyakeni emithathu.

• FUNDA NALA | UKaizer Junior uphawula ngekusasa likaNabi kwiChiefs

Wakhe neqembu eliqinile elikwazi ukumelana nezinselelo futhi elinengxube enhle yabadlali abasebancane nasebekhulile.

• SIBAMBE NAKU-FACEBOOK | Lisenethini.co.za

Uyifake kowandulela owamanqamu kwiCaf Champions League kule sizini lapho behlulwe khona kabuhlungu yiPyramids FC.