Kusala onegama kweleChiefs eliya eNetherlands
Ikusasa lomdlali wasesiswini weKaizer Chiefs u-Edson Castillo kule kilabhu libonakala licikiza.
Lokhu kulandela ukuvela kokuthi akayona ingxenye yeqembu eliya ekhempini yokuzilolongela isizini entsha eNetherlands.
“Ungamangali uma ekhululwa maduze,” kucashunwe umthombo usho kanje kwi-Unplayable.
Ukungaakwa kukaCastillo eqenjini elihambayo kukhomba into eyodwa – ukuthi isikhala sakhe kuleli qembu laseNaturena asisekho.
Kuvela ukuthi Amakhosi abheke ukuvula izikhala zabadlali bangaphandle ngaphambi kwesizini entsha yeBetway Premiership ka-2025/26.
Kukholakala ukuthi iKaizer Chiefs ilungiselela ukusayinisa abadlali abambalwa baseTanzania nakwamanye amazwe.
Futhi manje ukuvula izikhala zabadlali bokufika yinto ehamba phambili kubaphathi baleli qembu elizinze eNaturena.
Amakhosi amataniswa nabadlali abayisikhombisa abaqhamuka kwamanye amazwe, kanti kulindeleke ukuthi asayine okungenani abathathu kubo.
Unozinti waseRwanda, uFiacre Ntwari, naye ungomunye okungenzeka kunikelwe ngaye ukuvula isikhala somunye umdlali wangaphandle.
Lo nozinti, osayinwe esuka kwiTS Galaxy ekuqaleni kwale sizini, ulizwe ngendaba esikhathini esiningi ijezi.
Yize ikilabhu ingakenzi zimemezelo ezisemthethweni, kuyacaca kodwa ukuthi bobabili uCastillo noNtwari basohlwini lwabangase balaxazwe.
Lokhu kwenzelwa ukuthi ikilabhu ikwazi ukwamukela abadlali abasha bakwamanye amazwe, abazofika nomsoco ongcono eqenjini.
UCastillo, odabuka eVenezuela, ufike eNaturana kulindelwe lukhulu kuye.
Kodwa manje kubukeka sengathi uzokhonjwa indlela afika ngayo njengoba iChiefs ihlela kabusha iqembu layo ngaphambi mkhankaso omusha.
IKaizer Chiefs iqinisekisile kuleli sonto ukuthi omunye umdlali wangaphandle, u-Edmilson Dove, ngeke aqhubeke kuleli qembu.
Osekubhekwe kakhulu manje wukuthi ngobani abazovala izikhala zalaba abahambayo eNaturena.
