Ku‘Chipezezekile’ unozinti eqopha umlando ngendondo ye-PSL
U-Elvis Chipezeze weMagesi FC, odume ngemigilingwane yokumosha isikhathi uma izinto zilihambela kahle iqembu lakhe, useqophe umlando edla indondo yePremier Soccer League (PSL).
Ube ngunozinti wokuqala kusukela ngsizini ka-2022/23 ukunqoba indondo yoMdlali weNyanga kwi-PSL njengoba enqobe ekaMashi.
NgoLwesine, u-Elvis Chipeze umenyezelwe kanye nomqeqeshi wakhe u-Owen Da Gama no-Azola Ntsabo weChippa United njengabawine imiklomelo yanyanga zonke ye-PSL.
Kugcina ukuthi unozinti adle lo mklomelo woMdlali weNyanga bekungohlanganise uDisemba noJanuwari ngesizini ka-2022/23.
Kulokho kwaba unozinti weMamelodi Sundonws uRonwen Williams owawina ngaleso sikhathi, kwathi eminyakeni emibili kamuva, uChipeze owazalelwa eZimbabwe naye wakwenza lokho.
UDa Gama uqokwe njengoMqeqeshi weNyanga ngemuva kokwenza kahle kweqembu lakhe ebelime kabi libhekene nezembe.
Igoli lika-Azola Ntsabo alishaya kade kuyibhola elibekwe phansi liqhelile epalini iChippa ibhekene nePolokwane City ngoMashi 15 livotelwe njengeGoli leNyanga.
Ukusebenza okumangalisayo kwalaba abathathu ngoMashi kuhlonishwe ngokufanelekile yithimba lezintatheli nabasakazi bebhola eligunyazwe yi-PSL.
Uhlelo lokuvota kwenzeke ngoLwesithathu, ka-Ephreli 2 kanti belwenganyelwe yizikhulu zePSL nezivela kubaxhasi beligi, iBetway.
UChipezeze, ongunozinti weMagesi FC, uthole umklomelo woMdlali weNyanga kulandela ukungangenelwa goli emidlalweni emine ngoMashi.
Lo nozinti ube ngumdlali obalulekile kuleli qembu ngesikhathi liziqhelelanisa nezindawo zezembe.
Lo nozinti weMagesi unqobe le ndondo ebangisana nomdlali wasemuva we-Orlando Pirates osanda kukhushulelwa eqenjini elikhulu, uMbekezeli Mbokazi.
Bekukhona nomdlali wasesiswini weMamelodi Sundowns ovutha engabaselwe, uJayden Adams kulo mbango wale ndondo.
