Iyamudla uGift Links eyokugajwa kwiBafana engasazi isizathu
UGift Links useze asole ukuthi kukhona okungekuhle akwenza esekhempini yeBafana Bafana okwamqhatha nabaqeqeshi kodwa yena angakwazi.
Lo mdlali uvule isifuba ngokunyamalala kwakhe isikhathi eside kwiBafana — waveza ukuthi akakaze atshelwe ukuthi ugajekwani.
ULinks – odlala kahle kwi-Aarhus GF esigabeni esiphezulu eDenmark – akakaze aqokwe kusukela ngo-2021.
Manje, lo mdlali oneminyaka engu-27 ubudala uthi okumkhungathekisa kakhulu wukungaziswa iphutha alenzayo.
“Angikaze ngithole incazelo. Ngangikhona ngo-2021… kusuka lapho angikaze ngizwe lutho.
“Ngakho, bekulokhu kunjalo kusukela ngaleso sikhathi,” kusho uGift Links. “Kunzima.”
UGift Links usefomini enhle e-Europe, futhi muva nje ufinyelele emidlalweni engu-200 kwi-Aarhus.
Kodwa-ke, usalokhu enganakwa ngumqeqeshi uHugo Broos — yize sikhula isikhalo sokuthi kubhekwe nabadlali abazinze phesheya kwezilwandle.
“Kunzima ngempela kimina ngoba uma ngenza okuthile angizange ngithole ncazelo… ukube ngayithola ngabe ngiyaqonda.
“Okungiphatha kabi ukuthi ngaya ekhempini yeqembu lesizwe ngo-2021, kodwa kusuka lapho angikaze ngibe seqenjini, kuze kube namuhla.
“Angazi ukuthi kungani, ngoba akekho owake washo okuthile kimi. Mhlawumbe ngenza okuthile okungalungile.”
Naphezu kokuzithswa, uGift Links usalokhu egxile emsebenzini wakhe ekilabhini yakhe.
“Engingakwenza ukuqhubeka nokusebenza kanzima… mhlawumbe ngelinye ilanga izinto zizoshintsha,” kwengeza yena.
