Isidlale ‘ingaphelele’ isiwombe sokuqala iRoyal AM
- Sibongiseni GUMBI
Kube wusuku olunzima kusihlalo weRoyal AM, u-Andile Mpisane, njengoba ebhekane nobunzima emdlalweni abebebhekene kuwo neCape Town City.
Lo mdlalo weBetway Premiership ubuseHarry Gwala Stadium ngoMgqibelo ntambama kanti uphele zibambene ngo 1-1.
UMpisane uthole kunzima ukubamba umgqigqo nokuhambisana nesivinini somdlalo.
Le nsizwa esencane ayiyena usihlalo weRoyal AM nje kuphela, iphinde ibe ngumdlali.
Uyindodana kasomabhizinisi nomnikazi weRoyal AM, uShauwn Mkhize.
Yize abalandeli abaningi belingabaza ikhono lakhe, uMpisane uvame ukufakwa eqenjini.
NgoMgqibelo izinto azizange zihambe ngendlela abehlose ngayo.
Ubenenkinga yokuxhumana nozakwabo futhi wehluleka ukuba nomthelela obonakalayo emdlalweni.
ICity isheshe yalithola igoli njengoba liqhamuke ngomzuzu wesishiyagalombili ngoPrins Tjueza, yafaka i-Royal AM ngaphansi kwengcindezi.
Izivakashi zibe namathuba amaningi futhi bezingawathola namanye amagoli esiwombeni sokuqala.
IRoyal AM izithole ilandela ngemubva, kuyiyo ejaha umdlalo.
UMpisane ukwazile ukushaya amaphasi ambalwa ashesahayo kodwa akazange abe nomthelela obonakalayo.
Ngomzuzu wama-51, umqeqeshi uJohn Maduka unqume ukumkhipha, wafaka uMotebang Sera esikhundleni sakhe.
USera ungene kwabonakala ukuthi uzokwenzani, iRoyal AM yaqala ukukwazi ukudlala.
OLUNYE UDABA: UNabi uchaza eyokusala kukaBlom esikimini sakhe
Lo mgadli waseLesotho nguye oshaye igoli lokulinganisa sekusele imizuzu eyisithupha umdlalo uphele.
