UNabi uchaza eyokusala kukaBlom esikimini sakhe

Umdlali wasesiswini uNjabulo Blom, osanda kubuya kwiChiefs, akekho njengoba esasebenza ukubuyela esimweni sokuthi engadlala.

UBlom, obelekiswe yiqembu leMajor League Soccer iSt Louis City, ubuyele kwiChiefs ekuqaleni kwale nyanga.

Kodwa uNabi uthi usazodinga isikhathi esithe xaxa ukuze alungele ukudlala.

UNabi ufake abadlali abasha abahlanu eqenjini lakhe elizobhekana neMarumo Gallants eFree State Stadium ngoMgqibelo ngo-5.30 ntambama.

Phakathi kwabo kunomdlali oqavile uGaston Sirino, ofike nenjabulo emangalisayo kubalandeli beChiefs.

Isimo seqembu nje lilonke siyethembisa kulandela ikhempu ebe yimpumelelo ebiseTurkey.

Umgadli weChiefs, uRanga Chivaviro uveze ekuqaleni kwaleli sonto ukuthi iMarumo Gallants iyiqembu abangalazi kahle.

Naphezu kokuthi iGallants yenza izinguquko ezinkulu eqenjini ngemuva kokuthenga isitifiketi seMoroka Swallows, uNabi uyazethemba.

Uqinisekise abalandeli ukuthi abahlaziyi beChiefs bafunde kabanzi ngemidlalo yobungani yakamuva yeGallants.

Bayibonile la imandla kakhulu khona, nalapho inobuthakathaka khona.

UNabi ugcizelele ukubaluleka kokuqonda kahle izimbangi ukuze ukwazi uukuzihlelela.

“Abahlaziyi bethu benze ucwaningo lwabo ngabadlali bezimbangi futhi babuka imidlalo yabo yobungani,” kusho uNabi.

“Siyawazi amandla abo nobuthakathaka babo futhi sizilungiselele ngokufanele.”

Umdlandla mkhulu phakathi kwabalandeli beChiefs, njengoba umdlalo wangoMgqibelo uzodlalwa enkundleni egcwele phama.

Lo mdlalo uphawula ukuqala kwenkathi entsha kwiChiefs ngaphansi kukaNabi.

IChiefs izobe ihlose ukuqala kahle isizini ukuze ibuyise ithemba kubalandeli bayo.

OLUNYE UDABA: IRoyal AM ‘ithembele’ kusihlalo ukujuqa iCity

Abaqala umdlalo: Ntwari, Frosler, Miguel, Dortley, Cross, Zwane, Maart (ukaputeni), Shabalala, Sirino, Saile, Chivaviro.

Ibhentshi: uBvuma, uMsimango, uMashiane, uJansen, uCastillo, uVilakazi, uNgcobo, uDu Preez, uDuba.