Iqiniso ngokuthi iKaizer Chiefs yamshweba kanjani uBasadien
Seligcine liphumile iqhina embizeni ngokuhluleka kweKaizer Chiefs ukuthola uFawaaz Basadien.
Sekuvele ukuthi nebala leli qembu laseNaturena lasifaka isicelo esisemthethweni kwiStellenbosch sokudayiselwa lo mdlali.
Nokho yehluleka ukukhipha imali eyayibhekwe yiStellies, kwabe sekuqhamuka omachaphuna kusale babeka elinganiselwa ku-R15 million, bamthola.
Ikhuluma kwiBehind The Boot, imenenja kaBasadien uBasia Michaels ikuqinisekisile ukuthi bekungewona amahemuhemu nje ukuthi iChiefs iyamfuna.
Kodwa kube ngenxa yokungaboni ngaso linye ngemali lapho iKaizer Chiefs igcine ihluleke khona ngokusayina uFawaaz Basadien.
UKUKHULA KWENTENGO KABASADIEN
UBasadien “ubeyinsika” odongeni lwasemuva kwiStellenbosch kumasizini ambalwa edlule.
Uthole imiklomelo yoMdlali weSizini neyoMdlali oVelele oqokwe ngabanye abadlali emiklomelweni yokuphela kwesizini yale kilabhu.
Ngokwemvelo, uSteve Barker nebhodi leStellies babeka intengo ephezulu, ebonisa ukumazisa kwabo.
“Bekunentshisekelo evela kwiChiefs,” kusho uMichaels, eqinisekisa le ndaba eke yachithwa njengamahlebezi.
“Futhi empeleni bekunesicelo esisemthethweni esivela kwiChiefs ngokolwazi enginalo.
“Nokho ayizange ifinyelele emalini ebifiswa yikilabhu yakhe ngaleso sikhathi.”
Ngenxa yekhono alikhombise kwiStellies, ubumkhulu umbango kaBasadien:
- Isu leChiefs: Kubikwa ukuthi Amakhosi yafika nesicelo esihle impela futhi yashoda kancane kulokho obekufunwa yiStellies.
- ISundowns ivule iphakethe: AMasandawana, aziwayo ngokungagodoli uma kumele angene ephaketheni, abe esekhipha lokho okufunekayo, amthola kanjalo.
IQINISO NGENKONTILEKA YAKHE
Kuke kwavela ukuthi inkontileka kaBasadien kwiSundowns inemibandela ethile ngokudayiswa kwakhe.
Kodwa uMichaels uphinde wacacisa iphuzu elikhulu ngokudideka okukhona kubalandeli: uthi asikho isigatshana sokumdedela uma kuvela abamfunayo.
Lokhu kusho ukuthi usazohlala eChloorkop ngisho kungavela iqembu elimhalelayo uma lehluleka ukukhipha lokho okufunwa yiSundowns.
AKUMHAMBELI KAHLE
Selokhu ethuthele ePitoli, lo mdlali oneminyaka engu-29 ubudala uthole impilo “ekhaya lompetha” iyinselelo.
- Weqiwa yijezi: Eqenjini eligcwele ithalente (okuhlanganisa u-Aubrey Modiba noDivine Lunga), uBasadien akakangeni esikimini.
- Umthelela eqenjini lesizwe: Ukweqiwa kwakhe yijezi kumenze waphuthelwa yindawo eqenjini leBafana Bafana ebeliye kwi-Afcon eMorocco.
Lokhu kufanele ukuthi kube wumuthi obabayo kulo mdlali obengomunye wezethenjwa zikaHugo Broos.
Abalandeli beKaizer Chiefs basale bekhala, besola iqembu labo ngokungenzi okwanele ukuthola uFawaaz Basadien.
FUNDA NALA | OweSundowns uveza iqiniso ngomisiwe eqenjini
Kodwa manje iqiniso ngokuthi yini imbangela yalokho seligcine livelile futhi kuyacaca abemancane amathuba eChiefs.
