Intombi kaJayden Adams ivuse umunyu ivalelisa kuye
Intombi ka-Jayden Adams ongasekho, u-Aqueelah Adendorf, isiphawulile kulandela ukushona kabuhlungu kwalo mdlali weMamelodi Sundowns neBafana Bafana.
U-Adams ushone ngoMgqibelo eneminyaka engu-25 ubudala. Ukushona kwakhe kuqinisekiswe yiMamelodi Sundowns, iSafa, iPSL, uNgqongqoshe wezemidlalo uGayton McKenzie nomengameli weFifa uGianni Infantino.
Izinkulungwane zabantu emhlabeni jikelele zithumele imiyalezo yokududuza umndeni wakhe.
Ngaphambi komdlalo weNdebe yoMhlaba phakathi kwe-England neNorway ngoMgqibelo, kubanjwe umzuzu wokuthula ukuhlonipha u-Adams.
Lo mdlali ubesanda kubuya eNdebeni yoMhlaba neBafana Bafana, lapho edlale khona imidlalo emithathu kwemine.
Ngaphambi kokushona kwakhe, u-Jayden Adams ubhale umlayezo wothando ku-Instagram wakhe obuqondiswe ku-Adendorf.
Ngemuva kokudlula kwakhe emhlabeni, u-Adendorf ubhale umlayezo othinta inhliziyo.
“Awekho amazwi angachaza ubuhlungu engibuzwayo. Lala ngokuthula sithandwa sami,” kubhala yena.
“Ngiyabonga ngazo zonke izinkumbulo, ukuhleka, ukwangana nazo zonke izikhathi esabelana ngazo.
“Ubungelona nje uthando lwempilo yami kuphela, kodwa ubungumngane wami omkhulu nomuntu obengihlale engeseka.
“Ingxenye yenhliziyo yami ihambe nawe. Ngizohlala ngikuthanda kuze kube siphinde sihlangane.”
Uphinde wabonga bonke abantu abamthumelele imiyalezo yokumduduza.
“Ngiyabonga kini nonke ngemiyalezo yenu yokungiduduza,” kuqhuba yena.
- FUNDA NALA | Kuyabhimba kuRulani eLibya, ukhonjwa e-Egypt
“Isho lukhulu kimi nasendodakazini yethu uAllaia kulesi sikhathi esinzima. Ngiyabonga ngomusa wenu nokuqonda kwenu.”
Imininingwane yokufihlwa kuka-Jayden Adams isazokhishwa njengoba umndeni ubusacele ukuba unikwe ithuba lokuzijwayeza lesi simo.
- EZISHISAYO| Cofa lapha usithole kuWhatsApp
