Ingabe iChiefs ibanjwe ngophondo ‘ngephenathi’ kwidabhi?
IKaizer Chiefs isale ingenelisekile ngezinqumo zonompempe kuyo yomibili imidlalo yayo ngesonto elidlule – ibona sengathi ibambeke ngophondo.
Manje owayengunompempe kwiPSL uVuctor Hlungwani – osengumhlaziyi kwiSABC Sport – usehlahlele kahle lezi zimo ezikhalise Amakhosi.
Isikhalo sokuqala seKaizer Chiefs sibe semdlalweni wayo neStellenbosch FC ngoLwesibili, la ishaywe khona ngo 2-1.
IGOLI LIKA-DU PREEZ
Kulo mdlalo umgadli u-Ashlry Du Preez ushaye igoli, kodwa laphikwa, kwathiwa ubesesendaweni engamfanele.
“Wothi sibone la, uDu Preez washaya igoli, kwathiwa ubesesendaweni engamfanele,” kusho uHlungwani kwiSoccer Zone.
“Ibhola liya kuFlavio Da Silva, obe eseligoba… Uyaboba laphaya uDu Preez usendaweni engamfanele.
“Kodwa-ke khumbula ukuthi lokho akulona icala. Asibheke ke uma esethola ibhola, ubesengemuva kwalo.
“Ngakho-ke igoli bekumele ngabe libaliwe. Kodwa alibalwanga, kube yisinqumo esingesona.”
IPHENATHI KA-DA SILVA
Kuyiphindile lokho nasemdlalweni omkhulukazi ne-Orlando Pirates ngempelasonto la incishwe khona ‘iphenathi’.
UHlungwani ungenile kulesi sigameko la abalandeli beKaizer Chiefs bekhale ngephenathi abathi idaleke ngesikhathi uDa Silva ewa engaphakathi ebhokisini lePirates.
“Kube nesikhalo sephenathi la kulento eyenzeke phakathi kukaDeon Hotto noDa Silva,” kuqhuba uHlungwani.
“Awuthi sibhekisise ukuthi ubani okhahlele omunye la. Kuyanbonakala umlenze kaHotto la, uguqile futhi uthinte ibhola.
“USilva ube esezishayisa emlenzeni kaHotto wabe esenquma ukuvele abhukude… Uma ekwenza lokho unompempe ukubonile akwenzayo.”
IGOLI LIKAMBATHA KWIDABHI
NePirates nayo ishaye igoli kodwa laphikwa, kwathiwa uThalente Mbatha ubesesendaweni engamfanele.
“”UMbatha ushaye igoli la lajatshulelwa kakhulu… Kodwa sabona uLalelani Mngadi ephakamisa ifulegi lokuthi ubesesendaweni engamfanele.
“Ngabe ushaye khona? Uma sibhekisisa laphaya, siyabona ukuthi uMbatha nebala ubesendaweni engamfanele.
“Ikhanda lakhe lebiphambili kubembangi emgadile nebhola, ngakho uma edlala ibhola ubesevele esendaweni engamfanele.
“Kube yisinqumo esihle ukuthi umsizi kanompempe athi akulona igoli,” kucacisa lo nompempe wakudala.
FUNDA NALA | USaleng nesethembiso esikhulu kwabeDowns
IKaizer Chiefs isizokhala izithulise ngegoli ephikelwe lona, ebelizokwenza okungenani ithole iphuzu emdlalweni wayo neStellies.
Kodwa kwidabhi kubukeka sengathi akukho engakhala ngakho ngoba izinqumo – eziyivunile neziyiphikile – ngathi bezishaye emhlolweni.
