Indida ngoweBafana Bafana okuthiwa wadlala kungafanele
Ukunqoba kweBafana Bafana ngo 2-0 ibhekene neLesotho emdlalweni wokuhlungela iNdebe yoMhlaba kungase kuguqulwe, umphumela unikwe iLesotho.
Leli qembu likaHugo Broos kuthiwa lidlalise umdlali ongafanelekile kulo mdlalo obusePeter Mokaba Stadium ngoLwesihlanu olwedlule.
Umdlali wasesiswini weMamelodi Sundowns, uTeboho Mokoena, bekungafanele adlale kulo mdlalo.
Kuyiwe kulo mdlalo enamakhadi amabili aphuzi okumenza angavumeleki ukudlala, amiswe umdlalo owodwa.
Elokuqala walithola bedlala neBenin ngoNovemba ka-2023 waphinde waba nelinye bedlala neZimbabwe ngoJuni nyakenye.
Phezu kwalokhu, uMokoena udlalile bebheke neLesotho ngaphambi kokuthi akhishwe ngomzuzu ka-82.
Inhlangano eyengamele ibhola eLesotho beyinamahora angu-24 ngemuva komdlalo ukuthi ifake isimangalo ngalokhu.
Kodwa ayizange ikwenze lokho. Kodwa manje iSportswire .co.za ibika ukuthi abeLesotho FA babe nomhlangano ophuthumayo ngalolu daba.
Kuthiwa kulo mhlangano bebebheka indlela abasangalufaka ngayo kwiFifa lolu daba lukaMokoena.
Khonamanjalo, iSouth African Football Association (Safa) nayo isilusukumele lolu daba.
Ithimba labaqeqeshi kubikwa ukuthi seliyalelwe ukuthi lingamdalisi uMokoena emdlalweni ozayo neBenin ngoLwesibili.
Ulwazi ngokumiswa kwabadlali kuwumsebenzi wemenenja yeqembu uVincent Tseka, okunguye okumele azise abaqeqeshi ngokungamele badlale.
Imithombo ithi uTseka uvele uyamehlula lo msebenzi njengoba evamise ukungqubuzana nethimba labaqeqeshi.
Nguye owasolwa ngokuhlulwa wumsebenzi ngesikhathi ehluleka ukutholela indawo yokuzilolonga ngo-2022 ngesikhathi iBafana iyodlala neSierra Leone.
ISafa ingase ibhekane nenhlawulo noma ukuphucwa amaphuzu kweBafana. Kodwa ngathi kungagcina kube yinhlawulo njengoba iLesotho FA iphuzile ukufaka isimangalo.
Isinqumo seLesotho FA ngalolu daba njengamanje asikacaci.
Ngemuva kokunqoba iLesotho, iBafana Bafana ihamba iqhwakele kuGroup C ngamaphuzu angu-10 emidlalweni emihlanu.
Ishiya iBenin esendaweni yesibili ngamaphuzu amabili. Imidlalo ezayo izocacisa isiphetho sayo kweyokuhlungela iNdebe yoMhlaba ka-2026.
