IGomora ithi ‘eshila’ kwiHighlands Park ngokuyehlele
Umphathi weqembu le-ABC Motsepe League eGauteng, iGomora United, uRamakha Setenane, uthi akayizweli nhlobo i-Highlands Park.
ILions of the North igawulwe yizembe ngesihluku, yehliselwa kwiHollywoodbets Regional League ngemuva kokutholakala inecala lokudlalisa umdlali obhaliswe ngendlela engeyiyo.
I-Highlands, eyake yaba yiqembu lePremier Soccer League (PSL), bekulindeleke ukuthi imele iGauteng emidlalweni yokuhlunga ye-ABC Motsepe League.
Le midlalo ezoba seGauteng izokhipha amaqemnbu amabili azonyuselwa kwiMotsepe Foundation Championship.
I-Highlands Park, ebiqede iqwhakele kwilogi yaseGauteng, iphucwe amaphuzu angu-62 wonke ngokusebenzisa umgadli waseNigeria uFranklin Ogbonna.
Lo mgadli ubebhaliswe ngokusebenzisa amaphepha omgunyathi, okuhlanganisa neVisa yokufunda nemvume yokusebenza.
Ekhuluma neSABC Sport, uSetenane ukubeke kwacaca ukuthi imithetho ngumthetho futhi usebenza ngokufanayo kuwo wonke umuntu.
“Kungase kuzwakale kabi, kodwa ibhola lisebenza ngemithetho,” kusho lesi sikhulu.
“Bawathole ngokungafanele lawo maphuzu. Ubulungiswa benzekile ngokuthi baphucwe lawo maphuzu.”
USetenane uthi yiGomora United eyahlaba umkhosi ngalolu daba ngesikhathi bedlala neHighlands Park ngoJanuwari 24.
Elandela izinsolo azihletshelwa ozakwabo, wafaka icala wabe eseqala uphenyo.
“Ozakwethu uMakhaya noSechaba Masina bangitshela bathi, ‘Mphathi, sithembe. Faka icala ngalo mdlalo,’” kuqhuba uSetenane.
Uphenyo lwakhe lwaba nemiphumela emihle. Lwaveza ukuthi u-Ogbonna ubengabhalisiwe esikoleni akathi ufunda uso.
Kwatholakala nokuthi uMnyango wezaseKhaya awunawo irekhodi ngaye nokuba kuleli.
“Akufanele kwanokuthi ulapha ezweni lethu,” kusho uSetenane.
“Lokhu kufanele kube yisifundo kuwo wonke amakilabhu — kumele enze umsebenzi ngendlela efanele lapho ebhalisa abadlali.”
Njengoba iHighlands Park seyehlele esigabeni sesithathu, i-Gomora United yiyo ethathe indawo yayo emidlalweni yokuhlunga ezoqala ngoJuni 30.
