IChiefs nezintsha ngokulimala kukaMduduzi Shabalala
IKaizer Chiefs isikuqinisekisile ukuthi uMduduzi Shabalala uzohlinzwa ngemuva kokulimala kabi engalweni ngoLwesithathu.
Ulimale ngesikhathi edlaliswa kabi uJayden Adams weMamelodi Sundowns emdlalweni weBetway Premiership obuseLoftus Stadium.
Lo mdlali oneminyaka engu-22 ubudala ukhishwe ngohlaka kulo mdlalo obushubili futhi obekuqiniswe kuwo unyawo.
Manje Amakhosi asekuqinisekisile ukuthi ukuhlolwa kwakhe kuveze ukuthi uMduduzi Shabalala uchachambe ithambo eliphakathi kwehlombe nendololwane.
Ukulimala kusho ukuthi ngeke esadlala kule sizini njengoba iChiefs iveze ukuthi kulindeleke ukuthi kuthathe amasonto amahlanu kuya kwayisithupha ukuba alulame.
Lo mdlali wasesiswini uphuthunyiswe esibhedlela ngokushesha ngemuva kokulimala futhi usangaphansi kosizo lwezempilo njengoba kulungiselelwa ukuba ahlinzwe.
IChiefs iphinde yafisela lo mdlali ukuhlinzwa ngempumelelo nokululama ngokushesha.
Ukulimala kwenzeke ngesikhathi kulo mdlali neqembu njengoba uMduduzi Shabalala esengene emgqigqweni futhi eseyikhongco elibalulekile eqenjini.
U-Adams naye uxolisile, wafisela uShabalala ukululama ngokushesha ngemuva komdlalo ezinkundleni zokuxhumana.
Khonamanjalo, iChiefs nayo ibingenaye umgadli uWandile Duba kulo mdlalo weSundowns.
Le kilabhu isikuqinisekisile ukuthi uDuba yena walimala inyonga, kanti ithimba lezokwelapha liyaqhubeka nokumelapha.
