IChiefs ivaleleka ekhoneni ngoGlody Lilepo
Kubukeka sengathi iKaizer Chiefs izoba nesinqumo esikhulu okuzomele isithathe ngoGlody Lilepo ewindini elilandelayo lokudayiselana ngabadlali.
Lokhu kungenxa yokuthi sekuvele ukuthi liyakhula isasasa kulo mdlali wasesiswini odabuka eCongo.
Njengamanje sekunamahlebezi okuthi omacaphuna kusale baseLibya i-Al-Ittihad iphume inqina yokuzingela lo mdlali.
Ngokubika kwePhakaaathi, lezi ziqhwaga zaseLibya zilungiselela ukwethula isicelo sokudayiselwa lo mdlali oneminyaka engu-28 ekupheleni kwesizini.
Kuthiwa ufunwa kakhulu ngumqeqeshi walo ongowokuzalwa kuleli uRulani Mokwena obe esenxusa abaphathi ukuthi balinge iChiefs ngaye.
“UMokwena uthanda indlela uGlody Lilepo adlala ngayo futhi usecele abaphathi be-Al-Ittihad ukuthi bazame ukukhuluma neChiefs ngaye.
“Iqembu lisivumile isicelo sakhe futhi lizohambisa isethulo esihehayo maduze nje,” umthombo ucashunwe usho kanje.
Kukholakala ukuthi Amakhosi avulelekile ukuthi alalele izicelo ngoGlody Lilepo njengoba inkontileka yakhe izophela ngoJuni 2027.
Lokhu kungase kubeke le kilabhu ethubeni lokwenza imali enhle ngaye kunokuba ibe sengozini yokulahlekelwa nguye mahhala ngemuva konyaka.
UGlody Lilepo ujoyine iChiefs ngenkontileka yeminyaka emibili nesigamu esuka kwiValenciennes FC ngoJanuwari 2025.
