Ibambene ngezihluthu kule mpelasonto kwi-EPL
– NguNjabulo Shezi
Ompetha abavikela isicoco kwi-English Premier League (EPL) iLiverpool bazobheka ukuvula igebe kule mpelasonto njengoba kuyibo abasaqhwakele kule ligi.
ILiverpool isayinqobe yonke imidlalo yayo futhi inamaphuzu ayisishiyagalolunye.Nokho ixinwe yiChelsea esendaweni yesibili ngamaphuzu ayisikhombisa.
Nokho umdlalo obhekwe ngabomvu kule mpelasonto kule ligi ngowezimbangi zaseManchester ezizokhiphana inkani ngeSonto.
Lo mdlalo weManchester City neManchester United ufika nje womabili lamaqembu awakawubambi umgqigqo.
Ngokungajwayelekile, iMan City isendaweni ka-13 njengoba isanqobe umdlalo owodwa wemithathu esayidlalile.
IMan U yona isendaweni seyishiyagalolunye ngamaphuzu amane – isanqobe owodwa, yadlala ngokulingana owodwa, yahlulwa kowodwa.
Lo mdlalo unesasae elikhulu kwazise lezi zimbangi azibhekani. Elizonqoba lo mdlalo kungenzeka kulibuyisele ukuzethemba.
FUNDA NALA | Usefikile uMayo eNaturena
Iphekwe kanje isiyonke imidlalo ye-EPL kule mpelasonto:
- NgoMgqibelo: Arsenal v Nottingham Forest – 1.30pm; Bournemouth v Brighton – 4pm; Crystal Palace v Sunderland – 4pm; Everton v Aston Villa – 4pm; Fullham v Leeds – 4pm; Newcastle v Wolves – 4pm; West Ham vs Tottenham – 6.30pm; Brentford vs Chelsea -9.30pm
- NgeSonto: Burnley v Liverpool – 3pm; Manchester City v Manchester United – 5.30pm
