IChiefs yagabha ‘uMessi’ ngoba emncanyana ngomzimba
Umakadebona webhola lakuleli, uSurprise Ralani usedalule ukuthi iKaizer Chiefs yalenqaba ithuba lokusayinisa indodana yakhe, u-Emile Witbooi.
Lo mdlali oneminyaka engu-16 ubudala usanda kuqopha umlando neCape Town City FC.
Lapho eneminyaka engu-16, izinyanga eziyisithupha, nezinsuku ezimbili ubudala, ube ngumdlali omncane kunabo bonke ukudlala kwiBetway Premiership.
U-Witbooi usevele uzakhele igama esigabeni samazwe ngamazwe. Uhlale inyanga evivinywa kwiChelsea edlala kwi-English Premier League.
Lokhu kwakulandela ukwenza kahle kwakhe eqenjini leNingizimu Afrika lika-Under 17, Amajimbos, neqembu leCape Town City leDStv Diski Challenge (DDC).
Ekhuluma kwiSports Night Amplified kuMetro FM, uRalani uveze ukuthi indodana yakhe yachitha amasonto amabili kulezi ziqhwaga zaseSoweto.
Nokho iKaizer Chiefs yakhetha ukungamsayini, yakhala ngokuthi mncane kakhulu ngokomzimba.
“Waya kwiChiefs. Ngicabanga ukuthi kwakuwunyaka noma emibili ngaphambi kokuba aye kwiSchool of Excellence. IChiefs yamchitha,” kusho uRalani.
“Bakhala ngomzimba wakhe. Akondlekile ngokwanele ngokokulindelwe yibo kumdlali.
- SITHOLE KU-FACEBOOK | Cofa la, Lisenethini.co.za
“Kodwa ngokwebhola babona uyalazi, kodwa kwadingeka bambuyisele emuva.
“Bathi kusamele akhule kancane ngokomzimba. Ngakho kwenzeka kanjalo. Kodwa yena waya kwiKaizer Chiefs.
“Ngicabanga ukuthi wahlala cishe amasonto amabili. Bathi cha, mncane kakhulu, abadlali abebengontanga yakhe bebebakhulu kunaye.
“Ngakho-ke bavele bacabanga ukuthi udinga ukukhula kancane,” kwengeza uRalani.
Yize aphuthelwa uukusayina kuMakhosi, umsebenzi ka-Emile Witbooi uyakhula.
Ukuphumelela kwakhe kwiCape Town City kuphakamisa ukuthi unekusasa eliqhakazile.
- FUNDA NALA | Kuthiwa abamazi nhlobo eBrazil uRibeiro
URalani uthe manje kukhona abakwenzayo ngomzimba ka-Emile, ukuzama ukuthi athi ukufuthuka kancane.
“Ngokufana nabakwenza kuMessi, simfaka ohlelweni lokuthuthukisa umzimba wakhe.
“Lokhu kuhlanganisa ukudla ngendlela ethile kanye nejimu ukuze alungele ukuya e-Europe,” kuchaza uRalani.
- ZITHOLE ZISHISA | Cofa la, ujoyine iWhatsApp Group yethu
