Elabani igoli, elika-Ofori noma uLilepo? IChiefs iyacacisa
IKaizer Chiefs isiqinisekise ukuthi uMakabi Lilepo nguye oshaye igoli lesibili ngesikhathi bebhekene na-AmaZulu FC.
Lo mgadli omusha waMakhosi uvule ushaye igoli lokuqala bebhekene neStellenbosch FC ngoLwesihlanu olwedlule.
Nokho sekuvele ukuthi empeleni bekungelona elokuqala, kodwa elesibili.
Elokuqala walishaya ngesikhathi bebambana noSuthu ngo 2-2 kodwa leli goli laqale labalwa njengelibe wumkhonto ogwaze ekhaya kaRichard Ofori.
Lo mgadli wabe eseba yisisulu samahlaya ezinkundleni zokuxhumana, ehlekwa ngokujabulela igoli sengathi lishaywe nguye.
Nokho, manje iChiefs seyiqinisekise ukuthi umbiko kanompempe wona ulinika lo mgadli waseCongo leli goli.
“Igoli lesibili leKaizer Chiefsngesikhathi sidlala na-AmaZulu FC lishaywe uMakabi Lilepo,” ibhale kanje iChiefs ezinkundleni zokuxhumana.
Lokhu kusho ukuthi uLilepo useshaye amagoli amabili emidlalweni emithathu kwiChiefs.
Lo mgadli ujoyine iChiefs ngoJanuwari esuka eFrance la abedlala khona kumaligi aphansi.
