BUKA: Ogile iPirates kwiNedbank Cup uchaza ‘eyeziphambano’
Usolwe ‘ngobuthakathi’ unozinti weCasric Stars kulandela ukugila kwaleli qembu i-Orlando Pirates igoda kwiNedbank Cup ngempelasonto.
ICasric Stars iwashise iPirates ijezi kulo mqhudelwano kungazelele muntu, iyishaya ngo 5-4 sekukhahlelwa amaphenathi.
Umdlalo bewukade uphele zibambene ngo 0-0 ngemuva kwemizuzu engu-120 okuhlanganisa nesikhathi esengeziwe.
Kube sekuyiwa phansi kwepali la indaba iqedelwe khona, nokuyilapho lo nozinti – uWandile Mthombeni – ebe esegila khona izimanga.
UBEDWEWANI PHANSI?
Bekuthi ngaphambi kokubhekana nozokhahlela iphenathi, ahambe ayobhla okuthile phansi kwepali obekubukeka sengathi yiziphambano.
Usegcine ephawulile ngalokhu abekubhala, wathi nebala ubezidwebela iziphambano, bekungekho muthi.
“Amahora angu-48 edlule abematasa kimi ngoba ucingo lwami belukhala lukhalile,” kusho lo nozinti kwiSABC Sport.
“Wonke umuntu unelukuluku lokwazi ukuthi bengenzani. Mina ngiphuma emndenini wamakholwa, siyiqembu lamakholwa.
ITHEMBA LIKUNKULUNKULU
“Sisinda ngoNkulunkulu, futhi ebengikubhala phansi yiziphambano ezintathu, esikaYise, eseNdodana, nesikaMoya oNgcwele.
“Ngemva kwalokho, ube sewubhala ivesi olithandayo. Kimina bekukungu-Isaya 60:22, ‘lapho isikhathi sesilungile, Mina, Nkosi, ngizokwenza kwenzeke’.
“Lelo vesi liseduze kakhulu nenhliziyo yami ngoba bengilinde isikhathi eside ukuthola ithuba elifana naleliya lokuthi ngiqale imidlalo.”
KUBE BUHLUNGU NAKUYE
Okuxakayo wukuthi uWandile, ngokungefani noyise ongumqeqeshi nosihlalo weCasric Stars uBucs Mthombeni, yena ungumlandeli we-Orlando Pirates.
Ekhuluma nomunye wabalandeli, ucele uxolo wathi naye kubuhlungu kuye kodwa ubenza umsebenzi wakhe.
Uveze nesifiso sokuthi i-Orlando Pirates imsayine ukuze athathe izintambo kuSipho Chaine uma sekushaye isikhathi sokuthi awabeke ethala amagilavu.
“Bengidweba ukuthi lamaphenathi aye ngaphandle,” kusho yena ezincokolela kule vidiyo.
FUNDA NALA | Uzoba nzima umthelela wowoSuthu neDowns
“Ngiyaxolisa maBhakhaniya, nami ngiyiBhakhaniya ngokwami. Nakimi bekubuhlungu ngizibuza ukuthi kodwa ngenzeni?
“Kumele bangisayine ngizobanga noSipho Chaine.” Buka le vidiyo ngezansi:
