Isinqumo sePSL kweleSwallows noDumisani Zuma
Uphiko olubhekelele ukuxazulula izingxabano kwiPremier Soccer League (PSL), iDispute Resolution Chamber (DRC) isikhiphe isinqumo ngengxabano yenkontileka phakathi kweMoroka Swallows nowayengumgadli wayo uDumisani Zuma.
UDumisani Zuma ufake iMoroka Swallows icala kwiDRC. Usole le kilabhu ngokwehluleka ukumkhokhela imali yakhe yokusayina nomholo wakhe kaDisemba 2023.
Lo mdlali oneminyaka engu-29 ubudala owake waba kwiKaizer Chiefs waba ngomunye wabangu-22 abaxoshwa yiSwallows ngokungaziphathi kahle ekuqaleni kuka-2024.
Laba badlali bateleka ngaphambi komdlalo weDStv Premiership neMamelodi Sundowns ngoDisemba 2023.
IMoroka Swallows yaphinde yehluleka ukudlala omunye umdlalo la kwakumele ibhekane kuwo neGolden Arrows.
Kwathi ngokuhamba kwesikhathi iPSL yayihlawulisa u-R1 million, yaphucwa namaphuzu ayisithupha.
Ummeli kaDumisani Zuma uthe leli khasimende lakhe likweletwa u-R300 000.
Lokhu kuhlanganisa imali yokusayina nomholo kaDisemba. Usole iSwallows ngokwephula imigomo yenkontileka.
Nokho, iDRC ithole ukuthi umdlali waxoshwa ngendlela efanele.
Lesi sinqumo besisekelwe ebhukwini lemithetho le-NSL.
UDumisani Zuma akakwazanga ukufakazisa ukuthi iMoroka Swallows yephula imigomo yenkontileka yakhe.
I-SABC Sport ibika ukuthi kunobufakazi bokuthi uZuma wakhokhelwa ingxenye yeholo lakhe likaDIsemba 2023.
Wanxeshezelwa ngezinsuku azisebenza ngoDisemba 2023 ngaphambi kwesiteleka nokuqondiswa ubugwegwe.
I-DRC ithole iSwallows inephutha odabeni olulodwa. Leli qembu lehluleka ukukhokhela uZuma imali yakhe yokusayina.
Yize wawungekho umnqamulajuqu obekiwe wokhukhokha le mali, kwavunyelwane ngokuthi izokhokhwa ngesizini ka-2023/24.
I-DRC iyalele iSwallows ukuthi ikhokhele uZuma u-R200 000 wemali yokusayina akweletwa yona.
Kepha ngenxa yokuthi iSwallows ithengisele iMarumo Gallants isitifiketi sayo sokudaala esigabeni esiphezulu, le mali sekumele ikhokhwe yiGallants.
