UMngqithi usevuke ngomsebenzi kwelaseTanzania 

Iqembu elikhulu laseTanzania, iYoung Africans, seliqoke umqeqeshi waseNingizimu Afrika uManqoba Mngqithi njengomqeqeshi walo omusha ngaphambi kwesizini ka-2026/27.

Ngemuva kokunqoba isicoco seTanzania Premier League, iYanga ayizange ichithe sikhathi, yaqinisekisa ukuqokwa kukaMngqithi ngoLwesihlanu ebusuku.

Imemezela lezi zindaba, ikilabhu ibhale umlayezo omfishane ezinkundleni zokuxhumana. 

“Siyakwamukela kuYoung Africans SC, mqeqeshi omkhulu uManqoba Mngqithi. Asidlali,” kusho leli qembu.

U-Manqoba Mngqithi ubuyela ebholeni ngemuva kokushiya umsebenzi wakhe wakamuva kwiGolden Arrows, kanti manj usezohola elinye lamaqembu amakhulu e-Afrika.

Ukuqokwa kwakhe kusho ukuthi manje sekunabaqeqeshi ababili baseNingizimu Afrika abasebenza emaqenjini amakhulu aseTanzania.

Uzobhekana ngqo noSteve Barker, oqeqesha izimbangi ezinkulu zeYanga, iSimba SC.

UBarker usebevele enze kahle selokhu afika kwiSimba, njengoba esenqobe izindebe ezimbili ezinyangeni eziyisithupha kuphela ephethe iqembu.

Lokhu kulindeleke ukuthi kwenze umbango phakathi kweYanga neSimba ushube nakakhulu.

• FUNDA NALA | ISafa iphawula ngokushiya kukaBroos

Ukuqokwa kuka-Manqoba Mngqithi kuphinde kukhombise ukuthi abaqeqeshi baseNingizimu Afrika bayaqhubeka nokuhlonishwa emazweni ase-Afrika.

Siyakhula isibalo samaqembu akholwa ukuthi bangahola amaphrojekthi amakhulu futhi balethe impumelelo.

• EZISHISAYO| Cofa lapha usithole kuWhatsApp