IMagesi ivule isango, kuxoshwa inqwaba
IMagesi FC ibhekene nezinguquko ezinkulu ngemuva kokuhamba komqeqeshi uClinton Larsen nephini lakhe uPapi Zothwane.
Bangaphezu kwesikhombisa abadlali osekuvele ukuthi bakhinjwa indlela kuleli qembu elizinze eLimpopo.
ULarsen ushiye ngemuva kokuhola iqembu liqopha umlando ngokunqoba iCarling Knockout Cup, lihlula iMamelodi Sundowns kowamanqamu.
UZothwane usebenze isikhashana no-Owen Da Gama ongene esikhundleni sikaLarsen, ngaphambi kokuthi naye ahambe kungalindelekile.
Yize ukwenza kwayo kahle kwiCarling Cup kube yinto enhle neyingqophamlando, ifomu yayo kwiBetway Premiership ayigwinyisi mathe.
Emidlalweni engu-12, iMagesi inqobe owodwa kuphela, ihlula ngo 1-0 iGolden Arrows.
Ihlezi emsileni welogi yeBetway Premiership kanti ishaye amagoli amane kuphela yase ingenelwa angu-13.
Isinqumo sokukhulula abadlali sisuse inkulumompikiswano njengoba kubukeka sengathi kukhona okushaya amanzi kuleli qembu.
Abadlali abangomakadebona uLimbikani Mzava odlala emuva, nowasesiswini uKgaogelo Sekgota baphakathi kwabahambayo.
Ngokombiko weFARPost, uMzava udedelwa ngemuva kwengxabano abe nayo nabaphathi ngokukhokhwa kwamabhonasi.
Abanye abadlali ababhekene nokuxoshwa kubalwa uJacob Everson, uTumelo Njoti, uMokhele Maloisane, uMasegela Tholang noBongani Mpandle.
Iqembu kubikwa ukuthi libanikeze imiholo yezinyanga ezintathu njengengxenye yesinxephezelo sabo.
Kwenzeka zonke lezi nje leli qembu lisodakeni olunzima njengoba libhajwe endaweni elingadliwa yizembe kalula kuyo.
Isikhulu esiphethe ezokuxhumana nabezindaba kuleli qembu, uMmaphuti Mashamaite, wenqabile ukuphawula.
Nokho le ntokazi yethembise ukukhipha isitatimende esizochaza ngazo zonke izinguquko maduze.
“Sizokhipha isitatimende mayelana nezinguquko kuleli sonto,” usho kanje kwabeFARPost.
Emdlalweni olandelayo, iMagesi ibhekene nomsebenzi onzima njengooba izogadulisana nompetha beligi iSundowns e-Old Peter Mokaba Stadium.
Izothemba ukuphinda lokho eyakwenza ngesikhathi yehlula iSundowns kwiCarling Cup.
