‘Uyamkhumbula uGonzalez?’ Kukhuzwa abePirates ngoPedersen
Inkakha yakuleli, uMlungisi Ngubane, usexwayise abalandeli be-Orlando Pirates ngokujabula kuze kweqe ngomgadli wabo omusha u-Sebastian Pedersen.
UPedersen wethulwe yiPirates ngemuva kokumsayina kwiSogndal yaseNorway, kanti ufika nerekhodi elihle lokushaya amagoli.
Nokho, uNgubane uthi kuzomele aqale azibonakalise enkundleni ngaphambi kokuthi adunyiswe.
UNgubane uqhathanise injabulo yabalandeli bePirates naleyo eyabonakala ngesikhathi iKaizer Chiefs isayina umgadli waseColombia uJasond Gonzalez ngo-2023.
Lo mgadli wagcina edlale imidlalo engu-14 ngaphandle kokushaya igoli noma enze akhele uzakwabo.
“Namuhla kunzima ukwahlulela abadlali abasanda kusayinwa ngoba amaqembu asesayina abadlali abangaziwa kakhulu,” kusho uNgubane kwabeKickOff.
“UPedersen ufike eqenjini elidlala kahle, kodwa asazi ukuthi indlela adlala ngayo izohambisana yini nePirates.
“Mhlawumbe ubekwazi ukushaya amagoli ngamabhola aphakanyiswayo, kodwa uma engawatholi lapha angase abe nenkinga.”
Uqhube wathi ukubukeka komdlali akusho ukuthi uzophumelela.
“Angabukeka eyingozi, kodwa okubalulekile wukuthi uzokwenzani egqoke ijezi lePirates.
“NeChiefs yake yasayina umgadli omkhulu waseColombia, kodwa wagcina ehlulekile ukufeza okulindelwe.”
- FUNDA NALA | UShalulile usethole ikhaya elisha
Le ngwazi iveza ukuthi u-Sebastian Perdesen kumele anikwe ithuba aziveze kwi-Orlando Pirates kuqala ngaphambi kokuthi aphendulwe isihlabani.
- EZISHISAYO| Cofa lapha usithole kuWhatsApp
