Uwotha ubomvu uMcKenzie ngehlazo lempi kwiSafa
ISouth African Football Association (Safa) isiphinde yangena kwelinye ihlazo elibi, eliyehlisa isithunzi.
Ungqongqoshe wezeMidlalo uGayton McKenzie usehlasele kabi ubuholi bale nhlangano.
Lokhu kungemuva kwevidiyo eveza ingxabano equbuke emhlanganweni wesigungu esiphezulu sale nhlangano ngoMgqibelo.
Le vidiyo isabalale ngokushesha ezinkundleni zokuxhumana ezifana ne-X neTikTok.
Kukhombisa izikhulu eziphezulu zihilizisana ngamagama engxabanweni okucacayo ukuthi sekushoda ozogadla.
UGWAYI KATIKI
Engena ezinkundleni zokuxhumana, uMcKenzie obethukuthele egane unwabu ushiye angalazi, echaza lesi sigameko njengehlazo elibi.
Ukubeke kwacaca ukuthi inkathi yezinxushunxushu zokuphatha ngeke isabekezelelwa ngaphansi kobuholi bakhe.
“Lokhu kuwukuziphatha okuphoxayo nokuyihlazo kwabantu abanikezwe umsebenzi wokuphatha ibhola lethu,” kubhala uMcKenzie.
“Sizokwazisa iCaf neFifa mayelana nenhloso yethu yokuphenya nokuthatha izinyathelo ngalolu daba.”
Intukuthelo kangqongqoshe isukela ekutheni le “sekisi” yakamuva ifika ngesikhathi umnyango wakhe uzama kanzima ukubuyisa isithunzi sebhola.
Uthi lokhu kwenzeka nje basemkhankasweni wokuheha abaxhasi abazotshala imali ebholeni.
IHLAZO ELIDICILELA PHANSI IMIZAMO
Nokho uxwayise ngokuthi ukuziphatha okunjalo kwenza lo msebenzi ungabi kalula.
UMcKenzie ufuna iSafa ephethwe ngobuchwepheshe, exhaswe kahle ngemali engancikile kuphela esibonelelweni sikahulumeni.
Amaphutha okuphatha — okukhona kuwo nesigigaba sekhadi eliphuzi wlacishe lagila iBafana Bafana emkhankasweni wokuhlungela iNdebe yoMhlaba afaka le nhlangano ehlazweni.
“Sisebenza kanzima ukuletha uxhaso lwezinkampani ukuze sivumele lo mbhedo,” kwengeza uMcKenzie.
FUNDA NALA | Isililo kushona uMakhalanjalo wePirates
Ngokubandakanya izinhlangano ezilawula ibhola emhlabeni, uMcKenzie uveza ukuthi lolu daba kumele luthathelwe phezulu.
IFifa inemithetho eqinile emelene “nokugxambukela kukahulumeni,” kodwa ungqongqoshe uhlela lokhu njengendaba yokuvikela ibhola kuleli.
