UTrump uveza okwenze angenelele odabeni lwekhadi likaBalogun
Sekusuke omunye umsindo ebholeni lomhlaba ngemuva kokuthi umengameli wase-US, uDonald Trump, evume ukuthi ungelelile ekutheni kuhoxiswe ukumiswa kuka-Folarin Balogun.
UTrump uthi uxhumane nomengameli weFifa, uGianni Infantino, ecela ukuthi kubuyekezwe ikhadi elibomvu elanikezwa lo mgadli.
Lokhu kwenzeke emahoreni ambalwa ngaphambi kokuthi i-USA ibhekane neBelgium emzuliswaneni ka-16 weNdebe yoMhlaba.
Ngemuva kwengxoxo kaTrump no-Infantino, iFifa ibe seyiguqula isinqumo sayo, yahoxisa ukumiswa kukaBalogun umdlalo owodwa, yamvumela ukuthi adlale.
Lesi sinqumo sidale intukuthelo enkulu e-Europe. Inhlangano ephethe ibhola, i-Uefa, isola iFifa ngokwephula imithetho nokubeka engcupheni ubuqotho bomqhudelwano.
Ekhuluma eseWhite House, uTrump uthe akazange ayalele iFifa ukuthi iguqule isinqumo.
Uthi yena akwenzile wukucela kuphela ukuthi sibuyekezwe lesi sinqumo.
U-Donald Trump uphinde wagxeka unompempe waseBrazil, uRaphael Claus, ethi wenze iphutha ngokukhipha u-Folarin Balogun.
“Ngiyazithanda ezemidlalo futhi ngiyaliqonda ibhola. Lokhuya bekungelona iphutha elifanele ikhadi elibomvu.
“Kube wukushayisana nje kwabadlali ababili kuphela,” kusho uTrump.
UTrump uphinde wathi akulungile ukuthi umdlali avinjelwe umdlalo ongakadlalwa.
Uze wahlekisa ngokuthi uma iBelgium ishaya i-USA, uzothi nomdlalo “ubuhleliwe”, njengoba ake washo nangokhetho lwaseMelika lwango-2020.
Ngakolunye uhlangothi, u-Infantino ukuqinisekisile ukuthi ukhulume no-Donald Trump, kodwa wagcizelela ukuthi isigungu esizimele seFifa yiso esathathe isinqumo sokuhoxisa ukumiswa kuka-Folarin Balogun.
- FUNDA NALA | IPirates seyidedela abanye abayisikhombisa
Nokho, kuze kube manje, iFifa ayikakacacisi ukuthi yisiphi isigaba somthetho esisebenzisile ukuhoxisa lesi sijeziso.
Lokho sekushiye imibuzo eminingi njengoba uBalogun esezodlala bebhekene neBelgium.
- EZISHISAYO| Cofa lapha usithole kuWhatsApp
