Usolwa ‘ngokucwasa’ umsakazi weSuperSport
Sekuvele isikhalo ngomsakazi weSuperSport TV obethula bukhoma ngesiZulu umdlalo weRichards Bay neKaizer Chiefs ngoLwesibili ebusuku.
Lo msakazi – uPhumlani Miya – usolwa ngokusebenzisa amagama alumelayo ngesikhathi ephawula ngesiwombe la kube nengxabanyo enkundleni.
Umlandeli webhola ibiza ngo-@Sgadi28, uvake ividiyo kwi-X la uMiya ebekhuluma ngesigameko sokuxabana kwabadlali.
Kubadlali abebehilizisana bekukhona no-Aden McCarthy weKaizer Chiefs, nokuyilapho kube sekuphuma amagama angemahle.
“Ikhaladi empini… Ikhaladi empini… Ushaywa ngebhodwe ngisho nangenkomishi,” uzwakala esho kanje lo msakazi weSuperSport TV.
Lo mlandeli ofake le vidiyo ube eseba nesicelo kubaphathi bkhe ukuba bamkhuze kulokhu kukhuluma okunenhlese yokucwasa.
“Sicela nikhulume nomsebenzi wenu, le ndlela yokukhuluma akumele ikhuthazwe,” kubhala lo mlandeli, ethege iSuperSport TV neSSFooball.
Nabanye babe sebephawula, belibeka ngembaba elokuthi lento ayishilo umfokaMiya yicala elibomvu okumele ngabe uyalixoshelwa.
Kodwa u-@Sgadi28 ubemile kwelokuthi inhloso yakhe akukhona ukumxoshisa, kodwa wukuthi akhalinywe ekukhulumeni ngale ndlela.
Nokho abanye bathe lokhu kukhomba ubuhlathi futhi akumele ngabe kuyabekezelela emsakazweni omkhulu kangaka.
U-@Malatjie_ naye ukhombise uzwelo kuMiya, wathi kumele kukhulunywe naye ngoba uzwakala sengathi yena akakuzwa okubi kulokhu akushoyo.
“Kubi impela, futhi kakhulu. Kodwa ngicabanga ukuthi kumele afundiwe, akhalinywe,” kubhala u-@Malatjie_.
“Yena uzwakala sengathi akazi nokuthi lento ayishoyo ayifanele ngoba vele yinto ehlezi ishiwo emiphakathini yethu futhi asikhuzani ngayo.”
Kodwa u-@Donald34521 uthe ayikho leyonto, uMiya kumele ngabe uyakwazi ukukhuluma okungafanele nokufanele emoyeni.
“Akukhona indlela yokuziphatha kodwa yinkinga yokucabanga futhi kuyacwasa nje,” kuphendula yena.
“Ayikho into okumele afundiswe yona ngoba lento ayishoyo ayihlangene neze nebhola… Kumele ajeziswe,”
No-@SiveKepe ukhale ngokuthi noma ngabe yinto ekhulunywayo emiphakathini, kumele ngabe uyazi ayamukelekile emsebenzini.
“Indlela esikhuluma ngayo emakhaya nasemsebenzini ihlukene kakhulu. Ubhuti mdala uyayazi into ayishoyo.”
FUNDA NALA | UKaze ukhala ngebhadi eligubeleze iChiefs
ISuperSport TV beyingakaphenduli ngalokhu, futhi akucaci noma sikhona yini isikhalo esisemthethweni esifakiwe ngalokhu.
Akukhona ke okokuqala kuvela ukungenami kwabalandeli ngabasakazi nangezinto ababuye bazisho emoyeni ezilumelayo.
