UShalulile uyiphule seyisha nesobho iDowns eCongo

UPeter Shalulile ube yiqhawe leMamelodi Sundowns, esiza ekushayeni amagoli amabili asheshayo akhiphe leli qembu otakwini eDemocratic Republic of Congo. 

Lo mgadli waseNamibia ungene ushaye igoli lokulinganisa elithinta okokuqala ibhola.

Uphinde wabuya sekubalwa imizuzwana umdlalo uphele, wasiza ekutheni bathole elesibili ukuze banqobe ngo 2-1 kulo mdlalo weCaf Champions League ngoMgqibelo ntambama.

Amathuba eSundowns okudlulela esigabeni somkhumulajezi abesebukeka esengozini njengoba iSC Maniema ibihamba phambili sekusele ngaphansi kwemizuzu emihlanu. 

Kodwa uShalulile uyibuyisele emdlalweni ngamagoli akhe eqinisekisa ukuthi bathatha amaphuzu amathathu.

ISundowns seyinamaphuzu alinganayo ne-AS FAR Rabat yaseMorocco njengoba womabili lamaqembu eseqoqe ayisishiyagalombili.

Lezi zinkunzi zaseMorocco nokho yizo eziqhwakele kuGroup B ngenxa yamagoli amaningi eseziwashayile. 

I-AS FAR Rabat inethuba lokuphinde inwebe igebe libe ngelamaphuzu amathathi uma inganqoba embangini yayo yaseMorocco, iRaja Casablanca. 

Lezi zinkunzi zaseMorocco zizohlangana emdlalweni onguwafa-wafa ozoqala ngo-9 ebusuku ngoMgqibelo.

• OLUNYE UDABA: IChiefs isikhathele ukuba yihlaya kwiNedbank Cup

ISundowns kusazodingeka iwunqobe umdlalo wayo wokugcina ne-AS FAR Rabat ekhaya ngempelasonto ezayo ukuqinisekisa ukuthi iyadlulela phambili.