USangweni uyancoma, uveza afisa uMbokazi akulungise
Umdlali wasemuva we-Orlando Pirates, uSiyabonga “Nsimbi” Sangweni, usencome umdlali wasemuva osemncane waleli qembu uMbekezeli Mbokazi.
USangweni ukholwa ukuthi uMbekezeli Mbokazi ufanelwe wukuyodlala phesheya kwezilwandle.
NgokukaSangweni, uMbokazi engangena khaxa kunoma yiliphi iqembu e-Europe futhi umnxenxa ukuthi alwele lokho.
UMbokazi useneminyaka engu-19 nje kuphela, kodwa usezakhele igama njengomunye wabadlali basemuva abahamba phambili kwiPSL.
Lokhu ukwenze kungakapheli ngisho nonyaka eqale ukudlala eqenjini elikhulu kwiPirates.
U-TLB, okuyigama asaziwa ngalo ebholeni uMbekezeli Mbokazi, usadlale imidlalo engu-19 nje kuphela eqenjini elikhulu.
Uqale ukudlala kulo ngoDisemba odlule. NgoJuni, uMbokazi uphinde wadlala okokuqala eqenjini lesizwe iBafana Bafana.
“Umfana wenza kahle kakhulu. Kuyakhombisa ukuthi ungumfana wasemakhaya,” kusho ueSangweni engxoxweni yakamuva ne-1KZNTV.
“Angimazi ukuthi uzalwa kuphi, kodwa ngiyazi futhi uyabonakala ukuthi ungowasemakhaya.
“Uma engaqhubeka kanje futhi aziphathe kahle, azi ukuthi ufunani empilweni, angaya kude kakhulu ngebhola lakhe.
“Ngikholwa wukuthi angakwazi nokuya phesheya kwezilwandle… empeleni nje kumfanele lokho.
“Angadlala kahle nje noma yiliphi iqembu emhlabeni,” kwengeza uSangweni.
UMbekezeli Mbokazi udabuka ezindaweni zasemakhaya zaseHluhluwe oGwini oluseNyakatho leKwaZulu-Natal.
UNsimbi oneminyaka engu-43 ubudala, naye udabuka emaphandleni aseDondotha eMpangeni, kanti uveze into ayithanda kakhulu ngoMbokazi.
“Engikuthanda kakhulu ngaye ukuthi unamandla ngokomzimba futhi akawi kalula.
“Akasabi – akanavalo. Into eyodwa engicabanga ukuthi kumele athuthuke kuyona wukuphasa kwakhe kokuphasa ibhola maphakathi nenkundla elisusa emuva.
“Lokho kwenza kube nzima kakhulu ukuthi iqembu likwazi ukumaka uma kwenzeka imbangi iliwina lelo bhola.
“Uma engalungisa lokho nje kuphela, angaba ngumdlali ophelele,’ kusho uSangweni.
