UNabi ucacisa ngesimo sika-Ox Mthethwa kwiChiefs
- Intatheli yeLISENETHINI
Umqeqeshi weKaizer Chiefs, uNasreddine Nabi, usephawule ngekusasa likaSibongiseni “Ox” Mthethwa eqenjini lakhe.
Lo mdlali wasesiswini kuke kwabukeka ebekwe eceleni ngasekuqaleni kwesizini, engasondeli nasebhentshini uma iChiefs idlala.
Lokhu kuze kwaqala amahlebezi okuthi kungenzeka abolekiswe.
Kubalwe amaqembu ambalwa okukhona kuwo AmaZulu FC, Stellenbosch FC neMagesi FC ngesikhathi sewindi lokudayiselana ngabadlali.
Nokho lokhu akuzange kwenzeke, okushiye kunokudideka ngokuthi kwenzakalani ngekusasa lika-Ox kuMakhosi.
Phezu kwalokhu, lo mdlali uhlabe umxhwele, wazibuyisela ezinhliziyweni zabalandeli ngesikhathi edlala kwiHome of Legends Cup.
Ukwenza kahle kwakhe, ikakhulukazi bebhekene neMamelodi Sundowns, kukhumbuze wonke umuntu ngethalente lakhe.
Kuphinde kwagqamisa ukuthi kungani iChiefs yayize yaya le eKapa yayoncenga iStellies ukuthi ibadayisele yena kwasekuqaleni.
Manje uNabi useveze ukuthi umnyango awuvaliwe kuMthethwa, nabanye abadlali abebengakalitholi ithuba.
“U-Ox naye uyakuqonda lokhu… ngaphambi kwesizini lapho ngifika, ngicabanga ukuthi u-Ox wayeqonda ukuthi ngeke abe umdlali oqalayo,” kuchaza uNabi.
“Mhlawumbe ngokwengqondo lokhu kwamthikameza u-Ox, ngemuva kwalokho ngimbonile ethuthukisa isimilo sakhe…
“Ezinikela kakhulu ekuziqeqesheni ukuze abuyele eqenjini, kumele ube ngumdlalo ohlukile kwabanye abadlali basesiswini.
“Indlela engifuna kudlalwe ngayo idinga izinto ezithilekumdlali ngamunye, kodwa iphrofayili ka-Ox yinhle.
“Ungumdlali oyikhwalithi, uletha ibhalansi eqenjini kodwa njengamanje uyasiqonda isimo…
“Kunomncintiswano omkhulu wezindawo zokudalla futhi uvulekele kubo bonke abadlali.”
Lo mdlali wasesiswini oneminyaka engu-30 ubudala uzobe ebheke ukunikwa ithuba emidlalweni ezayo.
Lokhu kungoba omunye obephambi kwakhe, u-Edson Castillo akekho ngenxa yokulimala okuzomhlalisa ngaphandle isikhathi eside.
