UMaMkhize ucacisa eyesimo semali kwiRoyal AM
Umengamelo weRoyal AM, uShauwn “MaMkhize” Mkhize usegcine ephawulile ngezinselelo ezibhekene naleli qembu lakhe.
Iqembu kumanje lingaphansi komlawuli oqokwe yinhlangano eqoqa intela kuleli, i-SA Revenue Service (Sars).
Lokhu kuholele ekutheni abadllai bengaholi ngoDisemba, babe sebeqoka ukuteleka, nokuphoqe ukuthi kuhlehliswe umdlalo wabo neChippa United.
IPremier Soccer League (PSL) iwuhlehlisile umdlalo weBetway Premiership, obuzoba ngoMgqibelo eNelson Mandela Bay Stadium eGqeberha.
Kuqokwe umqaphi ozobuyekeza izindaba zemali zikaMaMkhize.
Imibiko ithi ukweleta iSars u-R40 million wentela ehlobene ne-trust yomndeni wakhe.
“IRoyal AM ifisa ukubhekana nesimo mayelana nokungakhokhelwa kwamaholo ngoDisemba, okuthinta abadlali bethu, ithimba labaqeqeshi nabasebenzi bonke,” isho kanje le kilabu esitatimendeni.
“Siyabuvuma ubunzima obubangelwe yilokhu futhi sidlulisa ukuxolisa kwethu kulabo abathintekile, kuhlanganise nemindeni yabo.
“Njengoba abaningi bazi, ikilabhu ingaphansi kwesandla somlawuli ngemuva komyalelo otholwe ngabakwaSars.
“Nakuba lokhu kuholele ekuqokweni kwesikhashana komlawuli, uJaco Venter, ukuthi engamele izimpahla nemisebenzi yekilabhu, siqinisekisa ababambiqhaza ukuthi i-Royal AM isalokhu izibophezele ekuxazululeni lolu daba ngokushesha okukhulu.
“Ithimba labaphathi bekilabhu, eliholwa yisikhulu esiphezulu nemenenja jikelele, belisebenzisana nomlawuli ukuze bathole imvume yokukhipha imali yokukhokha amaholo.
“Bekulokhu kuyisibophezelo seRoyal AM ukubeka phambili inhlalakahle yabasebenzi bethu futhi sihlala sizinikele ekusekeleni leso simiso naphezu kwezinselelo.
“Siyakwazisa ukubekezela nokusekelwa kwabadlali bethu, abasebenzi nemindeni yabo ngalesi sikhathi.
“Sibonga abalandeli bethu, abaxhasi nababambe iqhaza ngokuqhubeka nokusethemba nokuthembeka kithi.
“IRoyal AM izibophezele ekugcineni ubuqotho bekilabhu nokuqinisekisa impumelelo yayo yesikhathi eside.
“Sihlala sinethemba lokuthi lesi simo sizoxazululwa maduze futhi sizohlinzeka ngolwazi uma kukhona okuvelayo.”
Sekuvele ukuthi iPSL ikhathazeke kakhulu ngalesi simo saleli qembu laKwaZulu-Natal futhi ibheka indlela engaxazulula lolu daba ngokushesha.
