UManqoba Mngqithi akanelisekanga encisha amaphenathi
Umqeqeshi weGolden Arrows, uManqoba Mngqithi, usale esola izinqumo zonompempe kulandela ukuhlulwa kwakhe okokuqala selokhu ebuyele kuleli qembu.
Abafana Bes’thende bahlulwe ngo 1-0 yiMagesi FC emdlalweni weBetway Premiership eSeshego Stadium ngoMgqibelo ntambama.
Kodwa ngokusho kukaManqoba Mngqithi ezakhe zincishwe amaphenathi amabili acacile abengashintsha umphumela womdlalo.
Izigameko ezimbili ezenze uManqoba Mngqithi anengeke futhi anganeliseki ngonompempe u-Akhona Makalima zenzeke ngesiwombe sesibili.
Kwesokuqala uKnox Mutizwa uwiswe phansi engaphakathi ebhokisini leMagesi ngesikhathi esethi uyakhahlela ephambi kukanozinti.
Kwesesibili, uSibusiso Sibeko naye ukeqwe esebhokisini leMagesi kodwa unompempe wathi akwenzekanga lutho olubi kuzo zombili lezi zigameko.
“Isiwombe sokuqala besingesihle ngasohlangothini lwethu ekuhlaseleni nasekuvaleni emuva,” kusho uMngqithi ngemuva komdlalo.
“Isiwombe sesibili besingcono futhi ngicabanga ukuthi besingathola okuthile emdlalweni.
“Ngicabanga ukuthi bekumele sithole iphenathi kulento eyenzeke kuKnox. Futhi ngicabanga ukuthi bekuyiphenathi ecacile kule kaSibeko.
“Yiphenathi efanayo nengibabone bencishwa yona bebhekene neRichards Bay emdlalweni wabo odlule.”
UManqoba Mngqithi uthe onompempe kumele banyuse amasokisi ngoba sebeqala ukukhathaza indlela abenza ngayo.
“Sekujwayelekile manje ukuthi izinqumo zonompempe zingasiniki ithemba njengabaqeqeshi ngokuthi bakhona ukuvikela abadlali.
“Yibo okumele bamele lo mdlalo baqiniseke ukuthi imithetho iyagcinwa. Eqinisweni, isigameko sikaKnox bekuyiphenathi ecacile nje, engakhulumisi…
“Bekusobala futhi bekuyiphenathi esobala futhi eyenze phambi kukanompempe kodwa asangathola lutho.
“Angifuni nokho ukuzwakala sengathi ngikhononda ngephenathi ngoba asizange senze lutho ngesiwombe sokuqala.”
Uqhube wathi ikhefu abazoba nalo ngaphambi komdlalo olandelayo, la bezobhekana khona neKaizer Chiefs, lizomsiza ukuqinisa amabhawodi axegayo eqenjini lakhe.
I-Arrows izokwamukela iChiefs eMpumalanga Stadium emdlalweni weligi ngoMashii 30.
