Ufunelwa iqembu ‘ongufishi oshelwe amanzi’ kwiChiefs
- Intatheli yeLISENETHINI
IKaizer Chiefs ifunela umdlali wayo iqembu azothola ukudlala njalo kulo ukuze kuqine ukhakhayi.
Kuvela ukuthi leli qembu laseNaturena linenkinga ngoSabelo Radebe njengoba elizwa ngendaba ijezi kulo.
URadebe, oneminyaka engu-24, weqiwa yisikimu kusukela akhushulelwa eqenjini elikhulu eminyakeni embalwa edlule.
Manje iSABC Sport ibika ukuthi uRadebe ubukeka engekho ezinhlelweni zomqeqeshi uNasreddine Nabi zale sizini.
URadebe, onenkontileka neChiefs kuze kube uJuni ka-2026, udlale imidlalo emithathu kuphela ngesizini edlule.
Udlale emibili ngaphansi kukaMolefi Ntseki, nowodwa ngaphansi kukaCavin Johnson. URadebe ukhushulelwe eqenjini elikhulu ngesizini ka-2020/21 ngesikhathi iChiefs isesigwebeni sokungasayini abadlali.
UGavin Hunt, owayengumqeqeshi ngaleso sikhathi, kwadingeka athembele kubadlali abasuka enkulisa uukuqinisa iqembu.
Nokho uRadebe yena ufike wakuthola kunzima ukungena eqenjini eliqala imidlalo.
Umbango ushubile njengoba ebanga nabadlali abafana noYusuf Maart, Samkelo Zwane, Nkosingiphile Ngcobo, noGeorge Matlou.
Ngaphezu kwalokho, iChiefs iqinise isikwati sayo ngokusayinisa uGaston Sirino nokubuyisa uNjabulo Blom emboleke kwiSt Louis City e-US.
Lokhu kunciphisa kakhulu amathuba kaRadebe okungena eqenjini eliqala imidlalo.
Nokho iChiefs ayikabheki ukumdayisa noma ukumdedela uRadebe kodwa ibolekisa ngaye kwamanye amaqembu.
Kuthiwa isakholwa wukuthi uzogcina engumdlali osezingeni eliphezulu uma esethole ukuqina ukhakhayi kancane.
Iwindi lokudayiselana ngabadlali livuliwe kuze kube uSepthemba 20, okunikeza iChiefs isikhathi sokutholela lo mdlali iqembu azodlala kulo.
IChiefs izoqala umkhankaso wayo weBetway Premiership ngempelasonto lapho izobhekana khona noMarumo Gallants.
