Ubuyele ekhaya umqeqeshi weChiefs oshonelwe
- Sibongiseni GUMBI
IKaizer Chiefs seyimemezele ukuthi umqeqeshi wonozinti, U-Ilyes Mzoughi uzobe engekho emdlalweni wayo neMamelodi Sundowns.
Lamaqembu azogadulisana emdlalweni weBetway Premiership eFNB Stadium ngoMgqibelo ngo-3.30 ntambama.
Ngokwesitattimende esifishane esishicilelwe ezinkundleni zokuxhumana, u-Ilyes ushonelwe ngunina.
Iqembu libe selimkhulula ukuthi abuyele ekhaya ayoba nomndeni wakhe njengoba benganyelwe yilelifu elimnyama nje.
“Sithumela uthando noxolo kumqeqeshi wonozinti u-Ilyes Mzoughi oshonelwe unina uHasna Mansour,” kubhala iChiefs.
“Sinawe ngokomoya. Siyazi ubungakuthanda ukuba senkundleni weseke abafana nabo namuhla.”
UMzoughi usezakhele igama kubalandeli ngenxa yokuzimisela kwakhe nokuthanda abadlali akukhombisayo.
Isithombe sakhe ejabula noMfundo Vilakazi eqeda kushaya igoli emdlalweni wokuqala weligi sathrenda kakhulu.
Khonamanjalo, umdlalo walamaqembu uhlehliswe ngemizuzu engu-30 kulandela ukuthi abalandeli abaningi besabhajwe ngaphandle kwenkundla.
Amathikithi alo mdlalo (okukholakala ukuthi bekukhishwe angu-60 000) adayiswe aphela wonke.
