‘UMbhobho’ Ndlovu useyibhoboza Eswatini inethi
Owayengumqeqeshi wenkulisa kwi-Orlando Pirates uMandla Qhogi usevuselele ngempumelelo umgadli wakuleli uSenzo ‘Mbhobho’ Ndlovu.
Lo mgadli – odabuka eHlathikhulu, eMtshezi – uthole isiqalo esisha kompetha baseSwatini iNsingizini Hotspurs ecijwa uQhogi.
Ngemuva kwesikhathi esingesihle eNingizimu Afrika, lo mdlali oneminyaka engu-30 ubudala usesheshe waphenduka iqhqawe Eswatini.
UMbhobho ube nesikhathi esingesihle kuMaZulu FC kanti nokubolekiswa kwiDurban City akuzange kumsize ukubuyisa ukuzethemba.
Kodwa manje uNdlovu usehlohle amagoli amathathu emidlalweni emibili nje vo selokhu eshintshele Eswatini ngoJanuwari.
UKUBUYA KOKUZETHEMBA
UQhogi uyavuma ukuthi lo mgadli, owake wahlohla amagoli angu-23 ngesizini eyodwa kwiSinenkani FC, ufike Eswatini ukuzethemba kwakhe “kungekuhle”.
Lokhu kwenzeke ngemuva kokuthi ekhishwe ezinhlelweni zaMaZulu zale sizini ngaphandle kwencazelo ecacile.
“Udedelwe ngenxa yokungaphumeleli ngesikhathi ebolekisiwe… Ufike ngesikhathi esifanele kithina ngoba besintula amagoli,” kusho uQhogi kwiFARPost.
OKUHLE NGONDLOVU
- Isitayela sokudlala: UQhogi umchaze “njengomgadli wasebhokisini” owenza kahle uma ezolinda ibhola lize kuye.
- Umthelela osheshayo: Amagoli amathathu emidlalweni emibili achazele abalandeli ukuthi kungani elandiwe.
Leli qembu belidonsa kanzima phambi kwepali kulandela ukudayisa abagadli balo abaphambili oSambulo Simelane noJoel Madondo.
Yize ilahlekelwe ngabadlali abane abamqoka ngoJanuwari — okuhlanganisa nomdlali wasemuva uKwakhe ‘Stopper’ Thwala — iNsingizini Hotspurs isaqhwakele.
FUNDA NALA | U-Appollis uthi bazosikhiphela kwiChiefs isibhongo
UQhogi uncome ikhono leqembu “lokuthumela” ithalente ngaphandle kodwa lisale likwazi ukuqhubeka nokwenza kahle.
Uthe ukusayina kwalo uMbhobho Ndlovu kukhombisa ukuzimisela kwalo ukuqhubeka nokuba ngompetha Eswatini.
