UBroos uyihlele ngenye indlela iBafana kowe-Uganda

IBafana Bafana ne-Uganda bamemezele abadlali abaqinile abazoqala imidlalo yokuhlungela i-Afcon ka-2025.

Umdlalo wokuqala kaGroup K uzokuba se-Orlando Stadium ngo-6pm namuhla (ngoLwesihlanu).

INingizimu Afrika ihlose ukuqhubeka nefomu yayo enhle kusukela emidlalweni yokuhlungela iNdebe yoMhlaba.

Ngesonto elizayo izobhekana neSouth Sudan ekuhambeni. ISouth Sudan ihlulwe ngo 1-0 yiCongo Brazzaville ngoLwesihlanu.

IBafana ibhekene nengwadla njengoba ukaputeni uRonwen Williams engekho ngenxa yokulimala.

Uzakwabo kwiMamelodi Sundowns, uThemba Zwane nguye othathe ibhande lobukaputeni.

Indaawo kaWilliams epalini ithathwe nguVeli Mothwa osenesikhathi ekhona kwiBafana.

IBafana izokwethemba ukuqhuba irekhodi layo elihle uma ibhekene ne-Uganda njengoba lilihle kakhulu.

Ayikahlulwa emidlalweni emihlanu, inqobe emine, yadlala ngokulingana kowodwa.

Egcina ukuhlangana lamaqembu ngowobungani ngo-2021, iBafana yanqoba ngo 3-2.

Amagoli amabili ashaywa u-Evidence Makgopa kwathi uBongokuhle Hlongwane washaya elilodwa.

I-Uganda iqala lo mdlalo ngonozinti odlala eNingizimu Afrika, u-Ismael Watenga weGolden Arrows.

Abophele kanje lamaqembu:

Bafana Bafana XI: Mothwa, Modiba, Mudau, Dortley, Ngezana, Mokoena, Sithole, Zwane (c), Mokwana, Foster, Appollis

Ebhentshini: Chaine, Mobbie, Basadien, Mbatha, Adams, Mofokeng, Maswanganyi, Rayners, Kekana, Sibisi, Goss, Morena.

Uganda XI: Watenga, Bwomono, Kayondo, Mugabi, Capradossi, Ssekiganda, Kassim Mato, Aucho (c), Mukwala, Mutyaba, Omedi.