U-Yusuf Maart ‘udlelwe umzila’ kodwa akanankinga
U-Yusuf Maart unethemba lokuthi uzoqala emdlalweni ozayo weKaizer Chiefs ngemuva kokungena esuka ebhentshini bebhekene neStellenbosch FC.
IChiefs inqobe kunzima emdlalweni weNedbank Cup ngempelasonto edlule, okukhulise ukuzethemba eqenjini.
“Ukuwina kusinika ukuzethemba. Ngifuna ukubonga abalandeli ngokusesekela kwabo okumangalisayo eGqeberha,” kusho uMaart kwi-kaizerchiefs.com.
U-Yusuf Maart wengeze ngokuthi, “iCity isishayile sigcina ukudlala nayo, ngakho-ke sigqugquzelekile ukuwina kulokhu.”
ICity ishaye iChiefs eKapa, kanti manje Amakhosi azimisele ngokuziphindiselela uma esesekhaya eFNB Stadium.
Njengoba iChiefs isemiqhudelwaneni eminingi, imidlalo iza ngamandla fauthi iyashesha.
Kodwa-ke, u-Yusuf Maart ukholwa ukuthi bangakwazi ukubhekana nengcindezi yale midlalo.
“Siyakwazi ukumelana kahle nomthwalo. Abaqeqeshi kanye noSafi Majdi (ololonga imizimba yabadlali) bayasinakekela. Sidla kahle, silale ngokwanele, futhi silulame kahle,” kuchaza yena.
Amakhosi azimisele ngokujabulisa abalandeli bawo basekhaya ngemuva kokuhlulwa yiCity ngasekuqaleni kwesizini.
UMaart uyavuma ukuthi izimbangi zabo akulula ukuzazi ngoba zidlala ngezindlela ezihlukene kodwa uyalethemba isu leqembu.
“ICity ingadlala izitayela ezahlukene. Bathanda ukugijima, kodwa sigxile ekusebenzeni ngokulandela imiyalelo yomqeqeshi wethu,” kuqhuba yena.
Njengoba indebe yeNedbank Cup isiseduze futhi indawo yokungena emiqhudelwaneni yeCaf isangayinyeleleka, iChiefs izimisele ngokuqeda isizini ngamandla.
“Siyagqugquzelana ukuze siwine yonke imidlalo kusukela manje kuze kuphele isizini,” kuqinisekisa uMaart.
- FUNDA NALA | UJose Riveiro ugcine ephahlukile ngoSaleng
Lo mdlali wasesiswini ube nesizini engeyinhle ngokwezinga lakhe, kanti ukulimala kunciphise isikhathi sakhe sokudlala.
Naphezu kwalokhu, usazinikele empumelelweni yeqembu. “Wonke umuntu ufuna ukudlala.
“Kodwa siyazeseka izinqumo zomqeqeshi. Ibhola liwumdlalo weqembu, futhi sonke sikuwo ndawonye,” kuphetha yena.
IChiefs izobhekana neCape Town City ihlose ukuphindiselela ukuhlulwa kwayo phambilini nokuqinisa indawo yayo kwiligi.
