UFolz useyo‘Fohloza’ eTunisia, uvuke ngomsebenzi omkhulu
Owayeyiphini lomqeqeshi kwiMamelodi Sundowns, uRomain “Fohloza” Folz usevuke ngomsebenzini omkhulu njengoba eseqokwe njengomqeqeshi weqembu laseTunisia, i-US Monastir.
Lo mqeqeshi waseFrance oneminyaka engu-36 ubudala usayine inkontileka yonyaka owodwa naleli qembu elidlala kwiLigue 1 yaseTunisia, eqhubeka nohambo lwakhe lokuqeqesha ebholeni lase-Afrika.
U-Romain Folz waziwa kakhulu kubalandeli bebhola baseNingizimu Afrika ngenxa yezikhathi zakhe kwiMarumo Gallants, AmaZulu FC nangesikhathi eyiphini likaManqoba Mngqithi kwiSundowns.
Muva nje ubengumqeqeshi omkhulu kwiYoung Africans yaseTanzania, ngaphambi kwalokho wasebenza njengoSporting Director weqembu lase-Algeria, i-Olympique Akbou.
Kwi-US Monastir uzovala isikhala sikaTarek Jarraya, oshiye iqembu ngemuva kokuliqedisa endaweni yesihlanu ngesizini edlule.
UFolz useke wasebenza kumaqembu amaningi ase-Afrika okubalwa kuwo iHoroya AC yaseGuinea, iBechem United ne-Ashanti Gold yaseGhana, iTownship Rollers yaseBotswana neqembu lesizwe lase-Uganda njengephini lomqeqeshi.
Ngo-2022 wenza umlando ngesikhathi eba ngomunye wabaqeqeshi abancane kunabo bonke ukuqeqesha kwiPremier Soccer League ngesikhathi ephethe kwiMarumo Gallants.
- FUNDA NALA | UModiba nesicelo kuBroos ngeBafana
Uphinde wasebenza no-Arsène Wenger ohlelweni lweFifa Global Football Development, okuyinto emnike ulwazi olukhulu ekuqeqesheni emhlabeni jikelele.
Ukuqokwa kuka-Romain Folz kwi-US Monastir kuwuphawu lokuthi igama lakhe lisaqhubeka nokuhlonishwa ebholeni lase-Afrika.
- EZISHISAYO| Cofa lapha usithole kuWhatsApp
