UMbokazi uveza icebo ‘lenkani’ abagingqe ngalo iDowns
UMbekezeli Mbokazi, umdlali wasemuva osemncane we-Orlando Pirates, uthi bebengeke bavume ukugingqwa yiMamelodi Sundowns kabili kulandelana.
I-Orlando Pirates ishaye iMamelodi Sundowns ngo 2-1 emdlalweni weBetway Premiership eFNB Stadium ngeSonto ntambama.
Amagoli asheshayo kaRelebohile Mofokeng ngesiwombe sokuqala acacise zisuka ukuthi iPirates isikhathele ukudlala iSundowns.
UKhuliso Mudau ushaye eleSundowns lokubika ekhaya esiwombeni sesibili futhi kwalona uMbekezeli Mbokazi uthi libe yiphutha nje.
“Besazi ukuthi ngeke basiphinde ngetshe elilodwa,” kusho uMbekezeli Mbokazi ngemuva komdlalo.
“Sibahlelele kahle, futhi nomqeqeshi usitshelile ukuthi yini okumele siyenze ukuze sibashaye.
“Ngiyabonga nje kuwo wonke umuntu eqenjini, sisebenzile. Sisebenze ngokukhulu ukuzikhandla.”
UMbekezeli Mbokazi uqokwe njengoMdlali oVelele kulo mdlalo njengoba ekwazile ukumaka uLucas Ribeiro angenzi lutho umdlalo wonke.
Uthi kwagoli leSundowns bekungamele lingene. Liqhamuke kade abePirates bebheke ukuthi ibhola libekwe phansi.
Bekudlaliswe kabi umdlali weSundowns, kodwa ibhola lawela kuMudau, unompempe wathi awuqhubeke umdlalo.
“Inhloso bekuwukuthi bengatholi goli. Naleli abalitholile kube yiphutha lokuthi besizitshela ukuthi kuzoba yibhola elibekwa phansi.
“Kusukela ejimini nje besizimisele futhi besazi ukuthi ngeke balishaye igoli.
“Besinecebo lokubavimba ukuthi bengatholi ngisho elilodwa nje ithuba.”
Uvumile lo mdlali odabuka eHluhluwe ukuthi ukusheshe bathole amagoli kubasize kakhulu kulo mdlalo.
“Kusisize kakhulu ukuthi sisheshe sishaye amagoli,” kuqhuba lesi sitobha esineminyaka engu-19 ubudala.
“Besazi ukuthi uma sishaya amagoli, bona ngeke besawashaya amagoli alingana nawethu ngoba sizovala kakhulu emuva.”
