Kubhedile kwiCity, Usuthu labuya nawo ephelele amaphuzu
AmaZulu FC anyukele endaweni yesithathu kwilogi yeBetway Premiership yize kungenzeka kube okwesikhashana.
Usuthu lushaye iMarumo Gallants ngo 1-0 ekuhambeni ngoMgqibelo ntambama. Bese kungumdlalo wesithathu kulandelana lunqoba.
Igoli elinqobe ngalo Usuthu kulo mdlalo lishaywe uMlondi Mbanjwa esiwombeni sesibili salo mdlalo obudlalelwa enkundleni engeyinhle neze.
Ukuhlala koSuthu endaweni yesithathu kungase kube okwesikhashana ngenxa yokuthi uma i-Orlando Pirates inqoba izonyukela endaweni yesibili bese lona lwehla.
Elinye iqembu laKwaZulu-Natal, iDurban City lona alubanga nonyawo oluhle njengoba lifike lathola induku.
IDurban City ishaywe yiChippa United kaVusumuzi Vilakazi ngo 2-0 emdlalweni obuseBuffalo City Stadium ngawo uMgqibelo ntambama.
FUNDA NALA | UCardoso akakakhathazeki ngesimo seDowns
Womabili amagoli eChippa ashaywe uSinoxo Kwayiba kanti amaphuzu asize leli qembu lithi ukuphefumula njengoba lisendaweni embi.
IDurban City yona isahleli endaweni yesithupha yize ihluliwe kulo mdlalo, kodwa ingehla uma amaqembu angezansi kwayo enqoba.
