U-Itumeleng Khune ukhwele wadilika kwizimenenja zabadlali
Owayengunozinti weKaizer Chiefs u-Itumeleng Khune useveze afisa ukuthi ngabe wakwazi esemncane ngezimenenja zabadlali.
U-Itumeleng Khune ushiye iKaizer Chiefs ekupheleni kwesizini edlule, ngemuva kweminyaka engu-25 ekuleli qembu alijoyina eneminyaka engu-12.
Yize eseshiyile, lo mdlali oneminyaka engu-37 ubudala ugcizelela ukuthi akakawuthathi umhlalaphansi.
Ukholwa ukuthi kusekuningi ngakwenza enkundleni uma engaphinde anikwe ithuba.
Ekhuluma esidlweni sakusihlwa seNedbank Cup eThekwini muva nje, unxuse abadlali abasebancane ukuthi bayiqaphe ngeso lokhozi imali yabo.
Uthi yena uhlulekile ukukwenza lokhu futhi ufisa ngabe kukhona owamxayisa esemncane ngalokhu.
“Ngicabanga ukuthi ukufunda ngokuphathwa kwemali kubaluleke kakhulu,” kusho u-Itumeleng Khune.
“Singabadlali bebhola, sivame ukucabanga ukuthi sinezimenenja bese sithembela kuzo.”
UKhune, okukholakala ukuthi ubehola u-R480 000 ngenyanga ngesizini yakhe yokugcina kwiChiefs, usole izimenenja ngokuqola abadlala.
“Angiqondile ukwehlisa isithunzi noma ukucekela phansi umsebenzi wezimenenja…
“Kodwa ngasekupheleni kwesikhathi sami ekudlaleni ngayeka ukusebenzisa imenenja, futhi ngaqala ukubona umehluko ebhange lami.
“Ngesikhathi ngisengaphansi kwemenja, ngangicabanga ukuthi iyawenza umsebenzi wayo.
“Kodwa ababekwenza kwakuwukufika bazosayina inkontileka yeminyaka emithathu neqembu, bese belibala uwena,” kuqhuba uKhune.
“Bathola isabelo sabo semali, bese bekhohlwa ngawe ngoba akuwena kuphela umdlali wabo.”
Wenze isibonelo ngokuthi imenenja iba nabadlali abaningi abadlala indawo eyodwa, bese igcina ingabasebenzeli ngendlela efanayo.
“Baba nonozinti abahlanu abahlukene, abadlalela amaqembu ahlukene.
“Futhi uma ikilabhu isondela kwimenenja ithi sidinga unozinti, kufanele akhethe kulaba abahlanu ukuthi uhambisa muphi.
“Ngakho-ke, ngizwa sengathi izimenenja zimoshe isikhathi sami, futhi ukube ngangazi, ngabe ngikude manje.
“Abadlali bahlale begijimela kwizimenenja ukuze bathole iseluleko ngemali, kodwa zona zisuke zicabangela amaphakethe azo kuphela.”
