USolomons ubalula ugibe olukhube iChiefs ngesizini edlule
U-Dillan Solomons usexwayise ozakwabo kwi-Kaizer Chiefs ukuthi akumele bakhululeke kakhulu ngenxa yokuqala kahle kwiBetway Premiership kule sizini.
Amakhosi awakahlulwa emidlalweni emihlanu yeligi, anqobe emithathu adlala ngokulingana kwemibili.
Njengamanje ahlezi endaweni yesithathu kwilogi ngemuva kweMamelodi Sundowns ne-Olrando Pirates.
Nokho, uSolomons ukhumbula ukuthi iChiefs iqale kahle nangesizini edlule, yanqoba emine yadlala ngokulingana owodwa emidlalweni yayo emihlanu yokuqala.
Nokho izinto zabuye zajika, zaqala ukonakala ngemuva kwekhefu lamazwe omhlaba.
“Nangesizini edlule sasisesimweni esifanayo emidlalweni yethu emihlanu yokuqala.
“Sasidlala kahle futhi singakahlulwa,” kusho uSolomons oneminyaka engu-30.
“Ngemuva kwekhefu yilapho izinto zaqala khona ukungasihambeli kahle.
“Ukuqala kahle kuhle, kodwa kumele sibuye ekhefini elide sigcine umgqugqo futhi siqhubeke nokunqoba imidlalo.”
Ngaphambi kwekhefu, iChiefs izobhekana nePolokwane City ngoMgqibelo ePeter Mokaba Stadium, bese ibhekana neGolden Arrows ngesonto elilandelayo.
U-Dillan Solomons uphinde wakhuluma ngokunqoba kwe-Kaizer Chiefs ngo-3-2 ishaya iSiwelele ngesonto eledlule.
“Umphumela ube muhle, kodwa indlela umdlalo ohambe ngayo asijabulanga,” kuqhuba yena.
“Sifuna ukwenza kangcono, ikakhulukazi ekuvaleni emuva nasekunciphiseni amaphutha.”
USolomons ulindele umdlalo onzima kwiPolokwane City, wathi iChiefs kumele ilawule umdlalo ukuze ivimbele ukuhlasela ngokushesha kweRise and Shine.
“Bayiqembu elidlala ngokushintsha ngokushesha lisuka ekuvaleni emuva liye ekuhlaseleni.
“Kumele sigcine ibhola futhi sibavimbe ukuthi bathole lezo zikhala,” kuchaza lo mdlali.
- FUNDA NALA | UPieterse weDowns uvuma ubungozi bukaDion kubo
“Siyazi futhi ukuthi bangokomzimba, ngakho kumele sizimisele futhi siziphoqe emdlalweni.”
- EZISHISAYO| Cofa lapha usithole kuWhatsApp
